Plagoset një person në zonën e "Astirit" në Tiranë, humb jetën në spital. Arrestohet i dyshuari

Një person i plagosur me thikë pasditen e sotme në zonën e "Astirit" në Tiranë, ka humbur jetën në spital si pasojë e dëmtimeve të marra.

Shërbimet e Komisariatit të Policisë Nr. 6 dhe ato të Forcës së Posaçme “Shqiponja”, pas marrjes së njoftimit se në Unazë të Re, sot rreth orës 18:45, një shtetas kishte plagosur me mjet prerës, një 34-vjeçar, kanë organizuar menjëherë punën për kapjen e autorit dhe vënien e tij përpara përgjegjësisë ligjore.  

Si rezultat i veprimeve të shpejta policore, u kap dhe u shoqërua në komisariat për veprime të mëtejshme procedurale shtetasi Darmian Keli, 25 vjeç, banues në Tiranë.

Nga veprimet hetimore dyshohet se shtetasi Darmian Keli, për motive të dobëta, ka plagosur me mjet prerës shtetasin Amarildo Hoxhallari, 34 vjeç, i cili pavarësisht ndihmës së bluzave të bardha humbi jetën në spital.

Vijon puna nga grupi hetimor për sqarimin e rrethanave të ngjarjes.