Koreja e Veriut lëshoi një raketë balistike drejt Detit të Japonisë të enjten, thanë qeveritë japoneze dhe koreano-jugore, duke nxitur një sistem alarmi emergjent japonez për të paralajmëruar se mund të përfundojë pranë Hokkaido.
Qeveria japoneze e tërhoqi më vonë paralajmërimin, pasi u përcaktua se raketa balistike ndërkontinentale nuk do të ulej në afërsi të ishullit kryesor verior të Japonisë.
Ministri i Mbrojtjes Yasukazu Hamada u tha gazetarëve se raketa, e cila u hodh në lindje nga Koreja e Veriut në një kënd të gjerë, nuk binte brenda territorit të Japonisë ose zonës ekskluzive ekonomike.
Shefat e Përbashkët të Shtabit të Koresë së Jugut thanë se një raketë balistike me rreze të mesme ose më të gjatë, u lëshua rreth orës 7:23 të mëngjesit nga afër Phenianit, fluturoi rreth 1000 kilometra përpara se të binte në det.
Një zyrtar ushtarak i Koresë së Jugut tha se Pheniani mund të ketë testuar një lloj të ri rakete balistike me lëndë djegëse të ngurtë.
Në një konferencë shtypi në Tokio, shefi i kabinetit japonez Hirokazu Matsuno kritikoi lëshimin e fundit të raketës nga Koreja e Veriut si shkelje të rezolutës së Këshillit të Sigurimit të OKB-së, duke thënë se ishte “krejtësisht e papranueshme”.
Tokio bëri një protestë të fortë me Phenianin përmes ambasadës japoneze në Pekin, tha zëdhënësi i lartë i qeverisë. Kujtojmë se Japonia dhe Koreja e Veriut nuk kanë lidhje diplomatike.
Ministri i Jashtëm Yoshimasa Hayashi deklaroi në vijim se lëshimet e përsëritura të raketave të Koresë së Veriut përbëjnë një “kërcënim të rëndë dhe të afërt” për sigurinë e Japonisë.
Ndërkohë, zëdhënësja e Këshillit të Sigurisë Kombëtare të SHBA-së, Adrienne Watson, dënoi lëshimin e raketave balistike me rreze të gjatë veprimi nga Koreja e Veriut, duke thënë se kjo “ngre në mënyrë të panevojshme tensionet dhe rrezikon të destabilizojë situatën e sigurisë në rajon”.
Shtetet e Bashkuara do të marrin të gjitha masat e nevojshme për të garantuar sigurinë e aleatëve të saj kryesorë aziatikë të Japonisë dhe Koresë së Jugut.
Qeveria japoneze lëshoi fillimisht një paralajmërim J-Alert që u kërkoi banorëve të Hokkaido të strehoheshin pasi raketa mund të binte në afërsi të rajonit rreth orës 08.00 të mëngjesit, por më vonë ajo u tërhoq përmes një sistemi të veçantë alarmi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
