Prokuroria pritet të hetojë në vazhdim lidhur me veprimet e policisë gjatë protestave të opozitës, organizuar që nga data 16 shkurt e më tej. E gjithë kjo, pasi Prokuroria ka pranuar një kallëzim penal ndaj Ministrit të Brendshëm, Sandër Lleshaj dhe Policisë së Shtetit. Regjistrimi i kallëzimit penal ka ardhur pas një padie të ngritur nga Partia Demokratike.
Në padinë e depozituar nga sekretari i përgjithshëm i PD, Gazment Bardhi policia akuzohet për veprime në shkelje të ligjit. Sipas PD, Policia e Shtetit ka shpërdoruar detyrën në protestat e zhvilluara nga 16 shkurti deri në 16 mars.
Për Partinë Demokratike përdorja e gazit lotsjellës dhe ujit me presion për të shpërndarë protestuesit përkthehet në shkelje të ligjit dhe tej kompetencave ligjore nga ana e policisë. Me këto veprime sipas PD, policia nuk ka pasur synim zbatimin e ligjit por pengimin e zhvillimit të protestës.
Mbi këto pretendime të Partisë Demokratike, Prokuroria e Tiranës, ka regjistruar kallëzimin penal ndaj ministrit të Brendshëm, Sandër Lleshaj dhe Policisë së Shtetit. Tashmë pritet që Prokuroria të nis procesin e hetimit bazuar në këtë padi të ngritur nga PD.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
