Rama: Në shtator nis shkrirja në një e institucioneve që trajtojnë pronat (VIDEO)

Institutionet që merren me trajtimin e pronës do të bashkohen në një.

Gjatë një takimi me koordinatorët e bashkëqeverisjes me qytetarët, kryeministri Rama paralajmëroi se reforma për bashkimin e institucioneve që trajtojnë pronat do të nisë në shtator.

Rama tha se synimi është që Hipoteka dhe ALUIZNI të jenë në një institucion, ndërsa shtoi se kjo do ta bëjë më të lehtë për qytetarin aksesin në shërbime, por do të racionalizojë edhe burimet njerëzore.

“Në shtator jemi gati të lançojmë reformën për të cilën kemi filluar që të punojnë që verën e shkuar. Reformën e bashkimit të institucioneve të pronës, për të pasur një agjenci kombëtare të pronës. Për të mos shkuar e ardhur mes institucioneve, por për të pasur një institucion dhe një drejtim. Kjo reformë do të jetë rrënjësore dhe do të racionalizojë burimet njerëzore. Do të mundësojë një ecuri të shpejtë. Në fund të mandatit do të kemi një lehtësi për dhënien e titujve të pronësisë, përmes një programi dixhitalizimi”, tha Rama.