Përmbytjet e shkaktuara nga shirat e rrëmbyer që filluan në qershor, iu kanë marrë jetën të paktën 1061 personave në Pakistan, sipas numrit të fundit të vdekjeve të publikuar sot nga autoriteti kombëtar i menaxhimit të fatkeqësive.
Bazuar në të dhënat e fundit, 28 persona të tjerë kanë humbur jetën gjatë 24 orëve të fundit.
Autoritetet janë ende duke u përpjekur të arrijnë në fshatra të izoluar në zonat malore në veri të vendit aziatik, çka do të thotë se numri mund të bëhet edhe më i rëndë.
Më shumë se 33 milionë banorë, ose një në shtatë pakistanezë, janë prekur nga përmbytjet dhe gati një milion shtëpi janë shkatërruar ose dëmtuar rëndë, sipas qeverisë.
Autoriteti i Menaxhimit të fatkeqësive, raportoi gjithashtu se mbi 800 mijë hektarë tokë bujqësore janë përmbytur, si dhe 3400 kilometra rrugë dhe 157 ura.
Shirat e rrëmbyer, të njohur si musoni, një fenomen që zgjat zakonisht nga qershori deri në shtator, është i nevojshëm për të ujitur të mbjellat dhe për të rimbushur burimet ujore të nënkontinentit Indian. Por si pasojë e këtyre shirave, pothuajse çdo vit vijnë shumë tragjedi dhe fatkeqësi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
