Kryeministri Edi Rama pritet që të çojë këtë të hënë në gjykatën Kushtetuese presidentin Ilir Meta në lidhje me mosdekretimin e gjeneral Sandër Lleshajt si ministër të Brendshëm në kërkesën e parë.
Pak ditë më parë, Rama lajmëroi se do ta çojë Metën në Kushtetuese në mënyrë që veprimi i tij të mos bëhet precedent pasi sipas kreut të qeverisë, Presidenti nuk ka tagër të refuzojë propozimet e kryeministrit për kabinetin qeverisës.
Kryeministri sqaroi se përgjigjen e Kushtetueses do ta presë kur ajo të rivendoset në funksion, pasi aktualisht është me 2 anëtarë.
Ndërkohë, të premten e kaluar, kryeministri Rama firmosi kërkesën e dytë për dekretimin e Lleshajt, pasi sipas mazhorancës Meta nuk u shpreh me dekret për Lleshajn, por me një letër të thjeshtë.
Nga ana tjetër, zëdhënësi i Presidencës, Tedi Blushi, lajmëroi të shtunën se presidenti Meta ka kërkuar informacionet që herën e parë nuk i siguroi dot për z. Lleshaj.
Ndërsa zëdhënësi i Kryeministrisë, Endri Fuga, iu kundërpërgjigj duke thënë se përgjigjet do të vihen në dispozicion këtë të hënë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
