“Moska do të vazhdojë të mbështesë Penianin”/ Presidenti Putin mbërrin në Korenë e Veriut

Lajmi është bërë i ditur nga agjencia ruse e lajmeve Ria Novosti, e cila bëri me dije se avioni i liderit të Kremlinit u ul në aeroportin e kryeqytetit të Koresë së Veriut dhe se Putini u mirëprit nga lideri i Koresë së Veriut Kim Jong-un.

Ria raporton se presidenti rus shoqërohet nga ministri i Jashtëm Sergei Lavrov, ministri i Mbrojtjes Andrei Belousov, zëvendëskryeministrat Denis Manturov dhe Alexander Novak, shefi i Ministrisë së Burimeve Natyrore Alexander Kozlov, ministri i Shëndetësisë Mikhail Murashko, ministri i Transportit Roman Starovoyt dhe përfaqësues të kompanive të mëdha ruse, duke përfshirë kreun e Roscosmos Yuri Borisov dhe Hekurudhat Ruse Oleg Belozerov.

 Ky është udhëtimi i parë i Putinit në Korenë e Veriut në 24 vjet. Në vitin 2000, president i Koresë së Veriut ishte Kim Jong Il, babai i liderit aktual të Koresë së Veriut.

Sipas agjencisë së lajmeve Tass udhëheqësi i Koresë së Veriut Kim Jong Un u takua me homologun e tij rus në pistën e aeroportit.

Të dy liderët pritet të përdorin këtë udhëtim për të treguar lidhjet e ngushta midis Rusisë dhe Koresë së Veriut.

Këshilltari politik i Putinit, Yuri Ushakov, ka sinjalizuar gjithashtu se të dy vendet mund të nënshkruajnë një marrëveshje partneriteti për sigurinë.

“Moska do të vazhdojë të mbështesë Penianin në luftën e tij për pavarësi”, shkruante presidenti rus, Vladimir Putin, në një artikull për gazetën Rodong Sinmun në prag të vizitës së tij shtetërore në Republikën Popullore Demokratike të Koresë.