“Të largohen nga strukturat kush është shpallur ‘non grata’”, detaje nga mbledhja e Kryesisë së PD-së

Kanë dalë detajet e para nga mbledhja e Kryesisë së Partisë Demokratike të zhvilluar pasditen e sotme. Një ditë para mbledhjes së Kuvendit, nënkryetari i PD-së, Enkelejd Alibeaj ka propozuar që në strukturat qendrore të partisë të mos ketë më persona të shpallur “non-grata” apo individë të kapur nga ligji i dekriminalizimit. Për këtë vendim, anëtarët e kryesisë dhe deputetët kanë shprehur mendime të ndryshme.

“Kjo është për Sali Berishën. Ta themi qartë dhe shqip. A jemi ne në gjendje t’a përballojmë dot këtë ndaj demokrateve?”, mësohet të ketë thënë deputetja Dhurata Çupi.

Dakord me propozimin e Alibeajt janë shprehur Agron Gjekmarkaj, Kreshnik Çollaku dhe Orjela Nebiaj. Ndërsa Ervin Salianji ka propozuar që një gjë e tillë të miratohet si rezolutë.