Shtetet e Bashkuara janë rikthyer me një propozim të ri prej 28 pikash për përfundimin e luftës në Ukrainë, i cili parashikon, ndër të tjera, dhënien e territoreve Rusisë dhe legjitimimin e tyre në arenën ndërkombëtare. Çarmatimi i pjesshëm i Ukrainës dhe lëshime të tjera të njëanshme nga Kievi, pa masa të barasvlershme nga Moska, përbëjnë elementët kryesorë të planit amerikan.
Analisti Genc Burimi, në një intervistë për edicionin e lajmeve në MCN, e cilësoi këtë plan si të papranueshëm dhe të përsëritur, duke thënë se favorizon hapur Rusinë.
Sipas meje, ky plan është një ‘bis repetita’, një përsëritje e planit të mëparshëm të Donald Trump.
Një plan i favorshëm për Rusinë që më pas Trump e harroi, e riktheu përsëri, sepse ai ndryshon mendim vazhdimisht.
Deklaratat e Trump-it, të bëra në Shtëpinë e Bardhë në praninë e kryebashkiakut të Nju Jorkut, të cilit, sipas Trump i bëri shumë “temena”, ndonëse e kishte sulmuar rëndë gjatë fushatës, tregojnë se presidenti amerikan nuk pritet të ndryshojë qasje. Ky plan është 100% i papranueshëm.
Sipas Burimit, plani detyron Ukrainën t’i japë Rusisë edhe territore ku Moska nuk ka ende prani ushtarake.
Nuk është vetëm çështja e heqjes dorë nga anëtarësimi në NATO. Pika kryesore është kërkesa që Zelensky t’i falë Rusisë territore ku Putini nuk është sot prezent.
Në Donbas ka zona që Rusia i kontrollon plotësisht, si Krimea, por ka edhe zona që i ka futur në Kushtetutë, por nuk i zotëron 100%. E megjithatë, kërkohet që Ukraina t’ia dorëzojë 100.
Pozicioni ukrainas është i qartë: çdo plan paqeje duhet të mbështetet te linja aktuale e frontit, jo te pretendimet territoriale të Rusisë.
Ndërsa divergjenca tjetër lidhet me njohjen ndërkombëtare pas një armëpushimi të mundshëm.
Sipas Evropës dhe Ukrainës, edhe nëse vendoset paqja, nuk duhet njohur diplomatikisht situata e krijuar, ngjashëm me rastin e Qipros së ndarë, duke e lënë konfliktin të ngrirë. Por Trump thotë ‘jo, duhet t’ia njohësh Putinit, që ta ketë të përjetshme’.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
