Situata e krijuar mëngjesin e djeshëm në zonën e Astirit, ku gjatë aksionit për shembjen e banesave që do t’i hapin rrugë projektit të Unazës së Re pati përplasje mes banorëve dhe policisë, është reflektuar në një raport të detajuar të Avokatit të Popullit. Në faqen e tij zyrtare, ky i fundit shprehet se ekspertë të institucionit kanë vëzhguar nga afër veprimet e organeve shtetërore në terren dhe më pas në komisariatet e policisë e në Spitalin e Traumës, ku janë shoqëruar një numër shtetasish. Lidhur me zonën ku u zhvillua protesta, Avokati i Popullit thekson se punonjësit e stafit të tij janë penguar nga ana e autoriteteve të rendit, një shkelje e qartë dhe e përsëritur e ligjit.
Nga vëzhgimi në terren, Avokati i Popullit ka konstatuar se nga shtëpitë që më pas u shembën nuk janë hequr orenditë. Po ashtu, banorët kanë vënë në dispozicion të ekspertëve materiale video, në të cilat pretendohet ushtrim i dhunës nga na e policisë mbi burra dhe gra.
Avokatit i Popullit konkludon se situata e tensionuar e datës 12.11.2019 mund të shmangej me një qasje më pajtuese, konsensuale dhe mirëkuptuese nga ana e autoriteteve shtetërore kundrejt komunitetit të qytetarëve që ndihen të cenuar nga projekti i zgjerimit të Unazës së re.
Sidomos e domosdoshme ka qenë kjo qasje dhe më e panevojshme është bërë forca represive, në kushtet kur ky projekt duhet të ishte në fazë ngrirjeje, deri në verifikimin e plotë të dyshimeve të lindura për parregullsi ligjore në procedurat e tij.
Avokati i Popullit shpreh shqetësimin për përdorimin e vazhdueshëm të gazit lotsjellës si mjet i parë nga ana e forcave të policisë për të sulmuar grupe qytetarësh që protestojnë paqësisht, madje mbetet i paqartë protokolli i përdorimit të këtyre lëndëve, sidomos ndaj grumbullimeve të njerëzve ku të pranishëm janë edhe fëmijë, gra e të moshuar. Avokati i Popullit pret të marrë sqarime dhe një arsyetim shterues nga ana e Policisë së Shtetit në lidhje me këto procedura, si rezultat i të cilave disa qytetarëve u janë shkaktuar dëmtime, siç konfirmohet edhe nga autoritetet spitalore.
Dhuna gjatë shoqërimeve e referuar nga disa shtetas dhe jo vetëm në këtë rast, vazhdon të mbetet një problematikë shqetësuese, për të cilën Avokati i Popullit po vazhdon hetimin administrativ.
Avokati i Popullit gjithashtu shpreh shqetësimin për pengimin që u bëhet anëtarëve të ekipeve të tij, për të kryer detyrën, si gjatë konstatimit të veprimeve në terren, ashtu edhe më pas, gjatë përpjekjeve për akses në institucione të ndryshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
