Komisioni Hetimor për Metën miraton sot raportin që do të dorëzohet në Kuvend

Komisioni Hetimor për shkarkimin e Presidentit të Shqipërisë, Ilir Meta pritet të miratojë sot raportin e tij paraprak që do të dorëzohet në Kuvend.

Anëtarët e mazhorancës thanë një ditë më parë se kreu i shtetit ka cenuar marrëdhëniet me partnerët dhe se me deklaratat e tij për nxitje dhune ka kryer vepër penale.

Komisioni Hetimor për shkarkimin e Metës në fund të punës së tij, do t’i paraqesë Kuvendit një raport.

Raporti përfundimtar i Komisionit Hetimor që kërkon shumicë të cilësuar votash për t’u miratuar pritet të votohet nga kuvendi brenda javës së parë të Qershorit.

Ky i fundit, nëse e voton shkarkimin e Metës, e çon çështjen më pas në Gjykatën Kushtetuese.

Kushtetuesja është ajo që ka vendimin përfundimtar mbi fatin politik të presidentit, nëse ai qëndron në detyrë apo jo.