Një protestë e zhvilluar sot në Paris del pro presidentit Emmanuel Macron dhe kundër jelekëve të verdhë, pasi këta të fundit kanë paralizuar kryeqytetin francez për 11 javë me radhë.
Protesta e quajtur "Marshimi republikan për liritë" bashkon tre grupe, të cilët që nga dhjetori kanë shprehur kundërshtimin e tyre ndaj lëvizjes së jelekëve të verdhë.
Me sloganët “Mjaft” dhe “Fund dhunës”, Shamitë e Kuqe dhe Jelekët Blu u shfaqën për herë të parë në rrjetet sociale, duke kundërshtuar protestat e Jelekëve të verdhë, që kanë bllokuar qarkullimin çdo fundjavë e duke shkaktuar dëme miliona euro.
Por tashmë, ata janë organizuar për të dalë në sheshe dhe e kanë zgjedhur të dielën si ditën e parë të protestës.
“Ne denoncojmë klimën e kryengritjes të instaluar nga Jelekët e Verdhë. Ne hedhim poshtë kërcënimet dhe abuzimin verbal konstant ndaj atyre që nuk u janë bashkuar jelekëve të verdhë”, thuhet në manifestin e tyre.
"Shamitë e kuqe kërkojnë vetëm një gjë", thuhet në faqen e tyre në Facebook, "rivendosja e rendit publik dhe lirive individuale është e dmomsdoshme. Jeta duhet të fillojë përsëri në vendin tonë, me qetësi dhe respekt", thuhet në faqen e Shamive të Kuqe.
“Protestat e jelekëve të verdhë duhet të ndalen", tha për gazetën Parisien, zëdhënësi i Shamive të Kuqe, Philippe Lhoste. Ai mohoi se grupimi merr udhëzime ga partia e presidentit Macron, ndërsa theksoi se marshimit i bashkohen të gjithë njerëzit që janë ngopur me dhunën e jelekëve të verdhë.
Por megjithatë, ky "marshim republikan" shihet si një shqetësim për qeverinë, që ka hapur "debatin e madh kombëtar", me të cilin synon të qetësojë zemërimin e jelekëve të verdhë.
"Unë e kuptoj se disa francezë dëshirojnë të marrin pjesë, por nuk i përket marshimit ky rol, nuk duhet të luajmë njëra palë kundër tjetrës", tha Stanislas Guerini, përfaqësues i partisë së presidentit Macron.
Për këtë arsye, asnjë ministër nga qeveria franceze nuk do të bashkohet me marshimin. Pavarësisht se ka shprehur mbështetje për "shamitë e kuqe", ministri i arsimit Jean-Michel Blanquer ka vendosur të mos marrë pjesë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
