Situata në shtatë burgje në Ekuador mbetet ende jashtë kontrollit, ndërsa qeveria e Presidentit të ri, Daniel Noboa, vazhdon me ndihmën e ushtrisë përpjekjet për të rivendosur rendin publik pas dhunës së nisur të martën në Guayaquil nga grupe kriminale të lidhura me trafikut të drogës.
Të premten mbrëma, Policia e Guayaquil raportoi arratisjen e 5 të burgosurve të tjerë nga burgu El Litoral, i njëjti prej nga u arratis të hënën bosi i drogës Adolfo Macias, alias “Fito”.
Ndërkohë, hesapet mes bandave vijojnë brenda burgjeve dhe në orët e fundit autoritetet kanë nxjerrë kufomat e dy të burgosurve të hedhur jashtë gardheve të burgut të El Canar dhe Azuay.
Mbeten ende 170 pengje (155 agjentë dhe 15 civilë) në duart e të burgosurve rebelë në të gjithë vendin dhe negociatat e vështira për lirimin e tyre po kryhen gjithashtu me ndihmën e autoriteteve të Kishës Katolike.
Pas ditës tragjike të së martës, në të cilën të paktën 14 persona humbën jetën dhe shumë të tjerë u plagosën në bastisjet e bandave të armatosura të drogës, Presidenti Noboa shpalli gjendjen e “konfliktit të brendshëm të armatosur”, duke autorizuar përdorimin e forcave të armatosura në luftën kundër krimit të organizuar.
Gjatë së premtes, Forcat e Armatosura njoftuan se kishin çmontuar një pistë klandestine të përdorur nga narcos në qytetin Santa Elena dhe se kishin kapur 5 anëtarë të bandës “Los Lagartos” në Guayaquil.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
