Prokurori i Përgjithshëm i SHBA, Jeff Sessions, është shkarkuar nga presidenti Donald Trump.
Ishte vetë shefi i Shtëpisë së Bardhë i cili njoftoi me anë të një mesazhi në Twitter se Sessions do të zëvendësohet përkohësisht nga shefi i stafit të tij, Matthew Whitaker.
"Falënderojë prokurorin e përgjithshëm Jeff Sessions për shërbimin e tij dhe i uroj atij më të mirën!", tha Trump. "Një zëvendësim i përhershëm do të emërohet në një datë të mëvonshme".
Por sipas New York Times, Jeff Sessions ka dorëzuar dorëheqjen e tij me kërkesën e presidentit Trump.
Presidenti ka kritikuar në mënyrë të përsëritur Sessions, një ish-senator republikan dhe mbështetës i hershëm i kandidaturës së Trump për president të SHBA, shkruan BBC.
Sessions e kishte revoltuar presidentin kur u tërhoq nga hetimi për Rusinë që aktualisht po drejtohet nga Prokurori i Posaçëm, Robert Mueller.
Largimi i zotit Sessions e bën të paqartë fatin e zëvendësit të tij Rod Rosenstein, i cili është zyrtari i Departamentit të Shtetit që mbikëqyr zyrën e Prokurorit të Posaçëm, Robert Mueller.
Disa analistë thonë se, nëse Presidenti Trump shkarkon, ose shton trysninë mbi zotin Mueller, demokratët e Dhomës së Përfaqësuesve që siguruan shumicën në zgjedhjet e 6 nëntorit, mund të shqyrtojnë mundësinë për të filluar procedurat për shkarkimin e presidentit.
Në një letër dorëheqje, Sessions e bëri të qartë se vendimi nuk ishte i tiji.
"I nderuar zoti President, me kërkesën tuaj unë po dorëzoj dorëheqjen time", shkroi ai.
"Më e rëndësishmja, gjatë kohës sime si prokurori i përgjithshëm, ne kemi rivendosur dhe mbështetur sundimin e ligjit", shtoi Sessions, duke falënderuar presidentin republikan.
Largimi i kryeprokurorit ka ardhur vetëm një ditë pas zgjedhjeve të mesmandatit, në të cilat demokratët morën kontrollin e Dhomës së Përfaqësuesve – por suksesi i republikanëve në mbajtjen e kontrollit në Senat dhe shumica e ngushtë e tyre mund t’ia bëjnë më të lehtë Trumpit zgjedhjen e një pasardhësi të Sessionsit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
