Temperaturat e larta, mënyrat më praktike për t’u qetësuar gjatë të nxehtit

Valët e të nxehtit mund t’ju shkaktojnë shqetësime, pasi nxehtësia e tepërt mund të çojë drejt sëmurjes, por edhe mund të vrasë.

Disa njerëz janë më të prekshëm nga nxehtësia dhe kryesisht personat mbi 65 vjeç, ata nën 5 vjeç, gratë shtatzëna, njerëzit me kushte mjekësore si sëmundjet e zemrës dhe gjendjet e shëndetit mendor dhe ata që punojnë jashtë kanë nevojë për mbrojtje shtesë në mot të nxehtë.

Studimet tregojnë se vendosja e këmbëve në ujë të ftohtë është një mënyrë e mirë për të ulur temperaturën e trupit.

Gjithashtu do të ndihmojë në uljen e ënjtjes, nëse keni kyçet e këmbëve të enjtura. Megjithatë, bërja e një dushi të vakët do t’ju freskojë më shpejt dhe është mënyra më efektive për t’u qetësuar.

Mos u tundoni të zhyteni në ujë akull të ftohtë, pasi shoku i të ftohtit mund të jetë i rrezikshëm.

Në kushte kur nuk mundeni që të bëni dush, fokusohuni në ftohjen e këmbëve, duarve ose qafës dhe fytyrës.

Flladi freskues nga një ventilator në lëkurën tuaj mund t’ju bëjë të ndiheni më mirë, por jo gjithmonë ju qetëson.

Sipas udhëzimeve të Organizatës Botërore të Shëndetësisë, përdorimi i një ventilatori në temperatura mbi 35°C nuk do të zvogëlojë rrezikun e rraskapitjes nga nxehtësia.

Është e rëndësishme të qëndroni të hidratuar dhe të rifurnizoheni me mineralet që humbasim kur djersitemi. Një pyetje që ngrihet shpesh, është nëse është më mirë të pini pije të ftohta apo të nxehta.

Pijet e nxehta rrisin shkurtimisht temperaturën e trupit tuaj, por kjo më pas shkakton djersitje e cila ul temperaturën tuaj. Pijet e ftohta gjithashtu freskojnë, por mendohet se pijet e vakëta mund të jenë pak më efektive. Sido që të jetë, pini shumë lëngje.

Një mënyrë tjetër për të mposhtur nxehtësinë është noti. Por kini kujdes nga shoku i të ftohtit. Zhyteni trupin tuaj ngadalë në ujë, kuptoni kufijtë e aftësisë suaj për not.