Korsikë, katër persona të vdekur dhe një i zhdukur

Katër persona kanë humbur jetën dhe një tjetër është zhdukur në Soccia të Korsikës, nga një përmbytje e papritur e kanionit Zoicu.

Mes personave të vdekur është drejtuesja e guidës, një vajzë 7-vjeçare dhe babai i saj.

Lajmi është konfirmuar nga prokurori lokal, Eric Bouillard, i cili ka shpjeguar se viktimat ishin pjesë e një grupi prej 12 vetësh të cilët po zhvillonin një ekskursion në kanionin Zoicu.

Kanioni u godit papritur nga dallgë që ishin rreth 3 metra të larta, të cilat i zhvendosën personat dhjetra metra më tutje.

Dallga e papritur dyshohet të jetë shkaktuar nga një stuhi në mal, që shkaktoi reshje të forta shiu gjatë ditëve të kaluara.

Dy persona, një burrë dhe djali i tij 16-vjeçar, për fat të mirë arritën të shpëtonin duke u kapur pas një litari, ndërkohë që vazhdojnë kërkimet për personin e zhdukur.