Administratorja e kompanisë Integrated Energy BV, Arjola Kodra, dëshmoi sot para Komisionit Hetimor. Kompania e saj menaxhon inceneratorin e Sharrës. Në lidhje tre personat e shpallur në kërkim,
Stela Gugallja, Klodian Zoto, Mirel Mërtiri, Kodra tha se ka mbajtur komunikime jo të drejtpërdrejta por nëpërmjet stafit. Ndërsa në lidhje me kontaktin e fundit me ta, Kodra tha se nuk e mban mend kohën.
Pëllumbi: Pjesa që ka të bëjë me privat me privat, nuk ka të bëjë me hetimin.
Shalsi: Doja që t’i drejtoheshim në mënyrë etike. Mu duk se hera herësh u hakërryet.
Këlliçi: Koncensionari ka kërkuar financim përmes dy kontratave. Kjo është e dokumentuar dhe në raportin e KLSH. Nuk është aq detaj teknik sa e përmendët.
Pëllumbi: Ne jemi komision hetimor. Se si ndërron plani i biznesit të një kompanie është çështje e tij.
Tabaku: Kompania deklaron se nuk do të ketë nevojë për kredi dhe do të kryejë investimin me kapitalin e saj. A është i punësuar shtetasi Alqi Edmod Bllako? Çfarë pagesash ka marrë?
Administratorja: Ka qenë punonjës i Kompanisë Integrated Energy BV, por nuk është më. Ka qenë i punësuar para periudhës së administrimit tim.
Tabaku: Kur keni nisur?
Administratorja: Në 15/3/2019. Më parë ka qenë i punësuar zotëria.
Tabaku: Sa ka qenë paga e tij?
Pëllumbi: Se çfarë pozicioni ka pasur ai, është tagër i këtij komisioni dhe se sa i paguan ai.
Tabaku: A njiheni ju me shtetasit Edi Rama? Damian Gjiknuri? Engjëll Agaçi?
Administratorja: Këta zotërinj që përmendët i njoh si politikanë të Republikës së Shqipërisë.
Tabaku: Kur është nënshkruar kontrata?
Administratorja: Kontrata ka qenë për një afat 30-vjeçar dhe është lidhur me Ministrinë e Financave.
Tabaku: Sa ka qenë afati i përfundimi i punimeve?
Administratorja: Punimet kanë një afat nga momenti i zbardhjes së lejeve të ndërtimit. Leja e ndërtimit është zbardhur në nëntor të 2020-ës Dhe për 6 vite përfundon ndërtimi i tërësisë së veprave.
Çupi: Nga 2017 deri në 2020 nuk keni pasur asnjë marrëdhënie koncensionare me autoritetet publike?
Administratorja: Marrëdhënien kontraktuale, që është parashikuar në kontratën e koncensionit. Ne kemi nisur punimet të pajisur me një deklaratë paraprake nga Bashkia e Tiranës. Të gjendur në kushte të vështira ku ndodhej venddepozitimi i Sharrës, nisëm menjëherë rehabilitimin e zonës. Në 2020 është zbardhur leja e ndërtimit. Është dhënë një vendim për miratim në maj ku kemi pasur një dispozicion një deklaratë paraprake nga bashkia. Deklarata është marrë në dhjetor 2017.
Çupi: Nga kush është nënshkruar deklarata?
Administratorja: Është nxjerrë nga Bashkia e Tiranës.
Çupi: Sa është fondi që keni marrë nga 2017-ta deri në 2020 dhe më pas këtij viti?
Administratorja: Shoqëria koncensionare nuk merr fonde, por tarifën e shërbimit për punën që ofron. Nuk kemi marrë asnjë fond nga buxheti i shtetit për investimet për objektin e kontratës së koncesionit.
Çupi: Çfarë marrëdhënie ka shoqëria juaj me pasurinë ku është zbatuar kontrata, me truallin?
Administratorja: Zona ku zhvillohet projekti i shoqërisë koncensionare është vendosur në dispozicion nga Ministria e Infrastrukturës. Është pasuri private dhe pasuri publike.
Tabaku: Kur ka qenë kontakti juaj i fundit me tre personat që përmendëm Stela Gugallja, Klodian Zoto, Mirel Mërtiri?
Ariola Kodra: Komunikimet nuk kanë qenë të drejtëprejta sepse mbaheshin nëpërmjet punonjësve të shoqërisë që unë administroj.
Tabaku: Kur ka qenë?
Ariola Kodra: Unë nuk jam e detyruar të komunikoj me çdo kontraktor pasi kam një staf që më suporton për këtë pjesë.
Tabaku: Kur ka qenë komunikimi i fundit që ju ose stafi juaj ju kanë sjellë mbi tre personat që unë përmenda, që janë të tre nënkontraktorë të shoqërisë që ju administroni?
Ariola Kodra: Sa për pjesën e komunikimit tim ju përgjigja. Për stafin më lejoni të marr informacion dhe t’ju përgjigjem zyrtarisht.
Tabaku: Kur ka qenë komunikimi juaj me këta shtetas?
Ariola Kodra: Sapo ju përgjigja pyetjes tuaj. Kam komunikime me ta, por jo personalisht përmes stafit që unë drejtoj.
Tabaku: Unë nuk e mora përgjigjen. Ju sa më pranuat që i njihni këta persona dhe jeni në marrëdhënie me ta.
Ariola Kodra: Po kam nënshkruar kontratat e nënkontraktimit.
Tabaku: Kur ka qenë kontakti i fundit me ta, mund të ketë qenë para 5 vitesh kur ju kanë marrë në punë, thjesht po pyes kur i keni takuar për herë të fundit?
Ariola Kodra: Është një pyetje që nuk e kam memorizuar. Afatet e takimit nuk i kam të memorizuar.
Tabaku: Unë dua t’ju kujtoj zonja Ariola Kodra se dëshmia e rreme ka penalitete për ju.
Ariola Kodra: Jam në dijeni të faktit dhe jam e gatshme t’ju përgjigjem të gjitha pyetjeve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
