Kërkohej për tentativë vrasje në Shkodër, kapet në Tiranë

Një person i cili tentoi të vriste me armë zjarri në Shkodër një 21-vjeçar, është vënë në prangat e policisë së Tiranës, 

Gjatë operacionit të koduar “Operacionalja 89”, u ndalua në Tiranë shtetasi E. K., 32 vjeç, banues në fshatin Grudë e Re, Shkodër.

Prokuroria e Shkodrës kishte lëshuar urdhër për ndalimin e tij, për veprat penale “Vrasja në rrethana të tjera cilësuese”, mbetur në tentativë, “Prishja e qetësisë publike” dhe “Mbajtja pa leje dhe prodhimi i armëve, armëve shpërthyese dhe i municionit”.

32-vjeçari akuzohet se më datë 16 janar, në zonën e quajtur “Kryqëzimi i Vinotekës”, Shkodër, gjatë një konflikti për motive të dobëta, ka tentuar të vrasë me armë zjarri shtetasin A. M., 21 vjeç.

Po gjatë operacionit u arrestua dhe E. K., 27 vjeç, banues në fshatin Grudë e Re, Shkodër, drejtuesi i automjetit me të cilin lëvizte në zonën e “Freskut” i kërkuari.

27-vjeçari u arrestua për veprën penale “Përkrahja e autorit të krimit”, pasi drejtonte automjetin me të cilin lëvizte në zonën e “Freskut” Tiranë, 32-vjeçari që ishte në kërkim.