Aktorja amerikane fituese e çmimit Oscar, Angelina Jolie, thotë se po largohet nga roli i saj si ambasadore e agjencisë së OKB-së për refugjatët UNHCR pas më shumë se 20 vitesh.
"Unë besoj në shumë gjëra që bën OKB-ja, veçanërisht jetët që shpëton përmes ndihmës emergjente. Unë do të punoj tani me organizata të udhëhequra nga njerëz të prekur më drejtpërdrejt nga konflikti, që u japin zërin më të madh", tha Jolie, 47 vjeç.
UNHCR tha se ajo ishte një nga avokatet më me ndikim të të drejtave të refugjatëve. Në një postim në faqen e saj në Instagram, ylli i Hollivudit shkroi: “Pas mbi 20 vitesh, sot po largohem nga puna ime me agjencinë e OKB-së për refugjatët. Refugjatët janë njerëzit që i admiroj më shumë në botë dhe jam e përkushtuar të punoj me ta për pjesën tjetër të jetës sime”.
Jolie nuk dha detaje rreth organizatave me të cilat po planifikonte të punonte. Ndërkohë, UNHCR tha në një deklaratë se Angelina Jolie do të "angazhohet në një grup më të gjerë çështjesh humanitare dhe të të drejtave të njeriut".
Muajt e fundit, ajo ka takuar njerëz të zhvendosur në Ukrainën e shkatërruar nga lufta, Jemen dhe gjithashtu Burkina Faso.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
