Mijëra nacionalistë të ishullit të korsikës kanë protestuar duke kërkuar liri më të mëdha për ishullin francez, tre ditë përpara një vizite nga presidenti Emmanuel Macron.
Organizatorët e protestës thanë se deri në 25,000 vetë morën pjesë në demonstratën në kryeqytetin Ajaccio të ishullit.
Marshimi u hap me vajzat e reja që mbanin flamurin e Korsikës mbi shpatullat e tyre, ndërsa turma këndonte këngën "Luftë për pavarësinë" .
Një prej kërkesave kryesore të nacionalistëve ishte dhe amnistia për të burgosurit gjatë protestave pro pavarësisë.
Nacionalistët gjithashtu duan njohjen e gjuhës së korsikës si gjuhë zyrtare në institucione dhe njerëzit nga pjesët e tjera të Francës tu ndalohet blerja e pronave në ishull.
Protesta kishte për qëllim "të bindë" presidentin e Francës, Macron për të hapur një dialog.
Nacionalistët, të cilët kanë qeverisur ishullin prej 330,000 vetësh gjatë dy viteve të fundit, arritën performancën e tyre më të mirë në zgjedhjet rajonale të dhjetorit.
Aleanca e Korsikës fitoi dy të tretat e vendeve në një asamble të re rajonale, një rezultat që i dha një mandat të fortë për të kërkuar më shumë autonomi nga shteti i centralizuar francez.
Macron do të vizitojë Korsikën pikërisht njëzet vjet pasi zyrtari më i lartë francez në ishull, Claude Erignac, u qëllua për vdekje më 6 shkurt 1998 nga një aktivist pro pavarësisë.
Ai ka thënë më parë se është i hapur për dialog, por përjashtoi të bëjë ndryshime në kushtetutë, duke refuzuar në mënyrë efektive kërkesën e nacionalistëve për status të posaçëm për territorin.
Korsika, e njohur për plazhet më të mira në Evropë dhe vendlindja e Napoleonit, dikur ishte një shtrat i fuqishëm i militantizmit të dhunshëm anti-francez.
Për dekada militantët kanë zhvilluar një fushatë të armatosur çlirimtare, por në vitin 2014 ata shpallën një armëpushim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
