Drejtori i CIA-s, William Burns, vizitoi fshehurazi Kinën në muajin maj për bisedime me homologët e tij kinezë, tha të premten një zyrtar amerikan.
Lajmi për vizitën e kreut të CIA-s vjen në një kohë kur administrata e Presidentit amerikan Joe Biden po kërkon të promovojë dialogun me Pekinin.
Zyrtari tha: “Drejtori Burns udhëtoi për në Pekin ku u takua me homologët e tij kinezë dhe theksoi rëndësinë e mbajtjes së linjave të komunikimit të hapura brenda agjencive të inteligjencës”.
Vizita u bë e ditur nga gazeta Financial Times.
Administrata amerikane po kërkon të mbajë të hapura linjat e komunikimit dhe të zhvillohen takimet e planifikuara mes zyrtarëve të dy palëve, teksa atmosfera është e tensionuar.
Udhëtimi i Burns ishte gjithashtu vizita e nivelit më të lartë në Kinë nga një zyrtar amerikan që kur zëvendëssekretarja e shtetit Wendy Sherman shkoi në Tianjin në korrik 2021.
Biden në disa raste i ka kërkuar drejtorit të CIA-s të kryejë misione delikate, brenda dhe jashtë shtetit. Po ashtu Burns udhëtoi për në Moskë në nëntor 2021 për të paralajmëruar zyrtarët rusë që të mos pushtojnë Ukrainën.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
