Të paktën 7 persona, mes të cilëve 5 fëmijë, një oficer policie dhe një kalimtar i rastit, u vranë dhe 17 të tjerë u plagosën si pasojë e një shpërthimi në provincën jugperëndimore të Balochistan, Pakistan.
Zyrtarët e policisë lokale dhe autoritetet shëndetësore konfirmuan numrin e viktimave, ndërsa mosha e fëmijëve të vdekur ishte nga 5 deri në 12 vjeç.
Shpërthimi ndodhi pranë një shkolle të mesme vajzash në qytetin Mastung dhe kishte për qëllim një furgon policie, tha oficeri Miandad Urmani.
Sipas asaj që rezultoi, një bombë me telekomandë e vendosur në një motoçikletë u shpërthye pranë automjetit të policisë. Të plagosurit, mes të cilëve 4 efektivë policie, u transportuan në spitale për trajtim.
Shefi i policisë lokale Fateh Mohammad tha se një makinë ku ndodheshin nxënës shkolle ishte afër kur ndodhi sulmi.
Kryeministri Shehbaz Sharif dhe shefi i Balochistanit Sarfraz Bugti denoncuan sulmin dhe u zotuan të vazhdojnë luftën kundër kryengritësve derisa ata të eliminohen nga vendi.
Balochistani është vendi i një kryengritjeje të gjatë, me një numër grupesh separatiste që kryejnë sulme kryesisht kundër forcave të sigurisë. Grupet, duke përfshirë Ushtrinë Çlirimtare Baloch, po kërkojnë pavarësi nga qeveria qendrore.
Megjithatë, deri më tani asnjë grup separatist nuk ka marrë përgjegjësinë për sulmin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
