Në Tiranë është zhvilluar një takim mes drejtuesve të Policisë së Shtetit dhe përfaqësuesve të Zyrës Federale Kriminale të Gjermanisë (BKA), me fokus zgjerimin e bashkëpunimit në luftën kundër krimit të organizuar dhe forcimin e strukturave hetimore shqiptare.
Delegacioni gjerman, i kryesuar nga Gregor Erb, u prit nga Drejtori i Përgjithshëm i Policisë së Shtetit, Skënder Hita. Gjatë takimit u diskutua koordinimi i projekteve të përbashkëta dhe mbështetja për Policinë Kriminale dhe Institutin e Policisë Shkencore.
Hita vlerësoi mbështetjen dhe bashkëpunimin e vazhdueshëm të autoriteteve gjermane, duke theksuar se lufta kundër krimit global kërkon koordinim të fortë ndërkombëtar. Ai u shpreh se bashkëpunimi me BKA-në do të thellohet më tej për të goditur aktivitetet kriminale me shtrirje ndërkombëtare.
Nga ana tjetër, Gregor Erb garantoi vijimin e mbështetjes së BKA-së dhe agjencive ligjzbatuese gjermane për Policinë e Shtetit, përmes projekteve të përbashkëta, trajnimeve dhe pajisjeve moderne, me synim rritjen profesionale të strukturave hetimore shqiptare.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
