Kërcënohet kreu i KQZ-së, Klement Zguri, dhe familja e tij. Burime për Tema TV bënë të ditur se Zguri ka marrë kërcënime pas mbledhjes së djeshme të KQZ-së, në të cilën pati një debat të ashpër për hapjen e kutive të 30 qershorit.
Mësohet se rreth 30 minuta pas mbledhjes, Zguri ka marrë një mesazh kërcënues.
Kjo ka bërë që Zguri të vihet nën mbrojtjen e një numri të lartë efektivësh të Gardës së Republikës, të cilët ndodhën ne zyrën e tij, por edhe në ambientet e Komisionit Qendror të Zgjedhjeve.
Po ashtu, në mbrojtje është marrë edhe familja e Klement Zgurit.
Mbledhja dhe debati
Kryetari Komisionit Qendror të Zgjedhjeve, Klement Zguri, ka kërkuar të rishikohen edhe një herë procesverbalet e mbajtura më 30 qershor. Kërkesa e tij lidhet me parregullsitë që janë shfaqur gjatë ditës së zgjedhjeve më 30 qershor, ku numri i votave të hedhura në kutij ishte mbi 40 mijë më shumë se sa rezultatet paraprake të publikuara nga KQZ. Por kërkesa e tij u rrëzua nga 4 anëtarët e mazhorancës në KQZ.
Kërkesa e kryetarit të KQZ-së është cilësuar nga nënkryetari Denar Biba si një porosi nga opozita.
Anëtarja e KQZ-së, Edlira Jorgaqi, i kërkoi kryetarit të institucionit, Klement Zguri, që të japë argumentet ligjore të kërkesës së tij për të nisur hetimin administrativ mbi shifrat e ndryshme të raportuara nga KQZ në momente të ndryshme të procesit.
Ndërkohë, anëtari tjetër i KQZ-së, Bledar Skënderi, kërkoi që mbledhja e KQZ-së këtë të enjte të fokusohej vetëm te rendi i ditës që lidhej me miratimin e rezultateve përfundimtare për disa bashki që kanë më shumë se 1 KZAZ.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
