Kina ka nisur sot një stërvitje të paprecedentë ushtarake në 6 zona që rrethojnë Tajvanin, raporton “Reuters”. Lëvizja e Pekinit vjen një ditë pas vizitës së kryetares së Dhomës së Përfaqësuesve të SHBA Nancy Pelosi, në ishullin e vetëqeverisur që Pekini e konsideron si territorin e tij sovran.
Televizioni shtetëror i Kinës tha se stërvitjet kishin filluar dhe do të përfundonin të dielën. Ato do të përfshijnë hapjen e zjarrit në ujëra dhe në hapësirën ajrore përreth Tajvanit, tha ai.
Zyrtarët e Tajvanit kanë thënë se stërvitjet shkelin rregullat e Kombeve të Bashkuara, pushtojnë hapësirën territoriale të Tajvanit dhe janë një sfidë e drejtpërdrejtë për lundrimin e lirë ajror dhe detar.
Kina po kryen stërvitje në rrugët ujore më të ngarkuara ndërkombëtare dhe rrugët e aviacionit dhe kjo është “sjellje e papërgjegjshme, e paligjshme”, tha partia në pushtet në Tajvan.
Zëdhënësi i kabinetit të Tajvanit tha gjithashtu se faqet e internetit të ministrisë së mbrojtjes, ministrisë së jashtme dhe zyrës presidenciale u sulmuan nga hakerat.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
