<p>Vladimir Zelensky duhet të largohet “menjëherë” nga Ukraina dhe të shkojë në Francë në mënyrë që të mos pengojë bisedimet e paqes me Rusinë, ka thënë një burim i afërt me presidentin amerikan Donald Trump, sipas New York Post. Gazeta raportoi se zhgënjimi me Zelensky-n po rritet në Shtëpinë e Bardhë.</p> <p>Tensionet midis Uashingtonit dhe Kievit u përshkallëzuan këtë javë pasi Zelensky kritikoi Trumpin për përfundimin e periudhës së mosangazhimit diplomatik me Rusinë. Të martën, zyrtarët amerikanë dhe rusë u takuan në Arabinë Saudite për bisedime të nivelit të lartë që synojnë rivendosjen e lidhjeve dhe adresimin e konfliktit të Ukrainës.</p> <p>Zelensky ka kërkuar një vend në tryezën e bisedimeve, megjithëse Trump ka thënë se ai dhe zyrtarë të tjerë ukrainas nuk janë në pozicionin për të pasur pretendime. Ai ka bërë fajtor Zelenskyn për dështimin në zgjidhjen e konfliktit me Rusinë, pavarësisht se kishte vite për ta bërë këtë.</p> <p>Një burim i njohur me diskutimet e Shtëpisë së Bardhë i tha <a href="https://nypost.com/2025/02/20/us-news/zelenskys-friend-list-dwindling-in-the-trump-white-house-as-ukraine-russia-peace-talks-continue-best-case-is-that-he-leaves-to-france-immediately/">New York Post</a> se zhvillimet nuk janë "asgjë e re", duke shtuar: "Kam dëgjuar muaj më parë se është koha për zgjedhje [në Ukrainë] dhe udhëheqje të re".</p> <p>Burimi theksoi se kundërshtimi ndaj Zelenskyt është i përhapur brenda krahut perëndimor.</p> <p>Sipas një personi tjetër të afërt me Trump, “rasti më i mirë për [Zelensky] dhe botën është që ai të largohet menjëherë në Francë”.</p> <p>Zelensky, mandati presidencial i të cilit skadoi në maj 2024, ka refuzuar të mbajë zgjedhje të reja, duke e argumentuar këtë me ligjin ushtarak, në fuqi për shkak të konfliktit të vazhdueshëm.</p> <p>Trump në platformën e tij "Truth Social" është shprehur se Zelensky <em>"refuzon të mbajë zgjedhje, sepse është shumë poshtë në sondazhe në Ukrainë</em>".</p> <p>Zelensky u përgjigj duke akuzuar Trump për përsëritjen e "dezinformatave ruse". Zelensky pretendon se ka mbështetjen e 57% të ukrainasve në sondazhe.</p> <p>Por një sondazh i brendshëm i cituar nga The Economist sugjeron se Zelensky do të humbiste ndaj ish-komandantit të tij të përgjithshëm, Valery Zaluzhny, me një diferencë të madhe nëse zgjedhjet do të mbaheshin në këtë moment në Ukrainë. Sipas të dhënave të cituara në raport, Zelensky "do të humbiste zgjedhjet e ardhshme me 30% deri në 65% ndaj Valery Zaluzhny", nëse ky i fundit kandidon për president. Zaluzhny aktualisht shërben si ambasador i Ukrainës në Britani.</p> <p>Popullariteti i Zelensky u rrit në 90% gjatë muajve të parë të konfliktit me Rusinë në vitin 2022, por që atëherë është ulur për shkak të humbjeve në rritje në fushën e betejës dhe problemeve me ekonominë.</p> <p>Nga ana tjetër, Rusia e konsideron Zelenskyn "të paligjshëm" dhe njeh parlamentin ukrainas dhe kryetarin e tij si autoritetin e vetëm legjitim të vendit.</p>
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
