Koalicioni i partive pro-ruse dhe pro-serbe në Mal të Zi, Aleanca "Për të ardhmen e Malit të Zi", nuk do të jetë pjesë e qeverisë së re. Vendimi u mor pas diskutimeve prej rreth 8 orësh në kryesinë e partisë fituese të zgjedhjeve të fundit “Evropa Tani” dhe u njoftua nga kryeministri i zgjedhur Milojko Spajiç.
“Kanë refuzuar ofertat tona pesë herë. Nuk besojmë më në sinqeritetin e qëllimeve të tyre. Ne mendojmë se ata duan të pengojnë procesin. Nuk mund t'u besojmë në procesin që vijon, ndaj nuk do hyjmë në koalicion me ta.”, tha kryeministri i zgjedhur i Malit të Zi, Milojko Spajiç.
Më herët, presidenti i Malit të Zi, Jakov Milatoviq, paralajmëroi se është e papranueshme çdo përpjekje e aktorëve të huaj nga rajoni apo bota për të ndërhyrë në krijimin e Qeverisë së re.
Demokracia e Re Serbe e kryesuar Andrija Mandiç dhe Partia Popullore Demokratike e Milan Knezheviçit kanë 13 deputetë të zgjedhur në Kuvend. Ata kërkojnë heqjen e sanksioneve ndaj Rusisë për pushtimin e Ukrainës, anulimin e njohjes së Kosovës nga Mali i Zi dhe tërheqjen e vendit nga NATO. Po ashtu, liderët e këtyre partive nuk e njohin gjenocidin kundër boshnjakëve në Srebrenicë në vitin 1995. Serbia mbështet hyrjen e këtyre dy partive në qeveri, por bashkësia ndërkombëtare thotë se presin një Qeveri që do të trashëgojë vlerat evropiane.
Kuvendi i Malit të Zi ka 81 ulëse, ndërsa koalicioni fitues ka 44 deputetë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
