Vjosa Osmani: Ajo që ndodhi në KQZ e papranueshme, nëse përsëritet do të marr masa

Ushtruesja e detyrës së Presidentit, Vjosa Osmani ka folur ditën e sotme për mosçertifikimin e disa prej subjekteve politike dhe listave të tyre nga KQZ-ja.

Osmani shprehet se nëse do të ketë sërish abuzim me KQZ-në, si ditën e djeshme ku nuk u çertifikuan për në zgjedhjet e 14 shkurtit, Vetëvendosja, Nisma dhe AAK-ja, do të detyrohet të ndërmarrë masa.

 “I ftoj qytetarët të ruajnë maturinë dhe qetësinë që ta mbrojmë integritetin e procesit zgjedhor. Jam duke punuar afër me partnerët tanë që të kemi prezencën e tyre në këtë proces. Në rast se përballemi me situata të tilla ku abuzohet me KQZ për të shtyrë përpara agjenda partiake nga ana e anëtarëve të KQZ’së do të detyrohem që të ndërmarr të gjitha masat për integritetin e KQZ-së dhe procesit zgjedhor”, ka thënë Osmani

Osmani tha se ajo që ka ndodhur mbrëmë në KQZ është e papranueshme.

“Ajo çfarë kemi parë dje në KQZ ka qene paprecedentë, e pahijshme dhe e papranueshme për një institucion që duhet të bëj çmos që ta mbrojë integritetin. Në transmetime të drejtpërdrejte u bë presion marramendës nga Drejtori i Zyrës për Certifikimin e Subjekte Politike si dhe u tolerua dhe u ushtrua presion ndaj drejtorit të kësaj zyre”, ka thënë ajo.

Sipas saj edhe kryetarja Valdete Daka duhet ta përmbush detyrimin e saj ligjor ashtu edhe siç edhe është betuar.

“Përderisa të gjithë anëtërat japin betim që të kryejnë detyrat në mënyrë të paanshme dhe të përgjegjshëm e poashtu edhe të kryetaresh së KQZ’së që nuk e përfaqëson asnjë subjekt politik. Ajo që ka ngjarë dje e ka lënduar integritetin e KQZ’së. Në asnjë moment dhe në asnjë mënyrë nuk duhet që të biem në kurth” ka thënë Osmani.

Komisioni Qendror i Zgjedhjeve nuk i certifikoi listat zgjedhore me emrat për deputetë të subjekteve politike, Vetëvendosje, Nisma Socialdemokrate dhe Aleanca për Ardhmërinë e Kosovës, për të marrë pjesë në zgjedhjet e jashtëzakonshme parlamentare të 14 shkurtit.

Kjo për faktin që në listat e këtyre partive politike figuronin akoma emra që kanë probleme me ligjin, apo janë të dënuar me formë të shkallës së prerë në tri vitet e fundit.