Procesi i Rindërtimit, shëndetësia, arsimi, fermerët dhe infrastruktura janë konsideruar si sektorë prioritarë nga qeveria gjatë vitit 2021, ku edhe janë mbështetur me fondet e nevojshme.
Sipas relacionit të pr/buxhetit i cili ka marrë miratimin e Këshillit të Ministrave, procesi i Rindërtimit do të financohet me 28 miliardë lekë në vitin 2021, ndërkohë, që mbi këtë edhe 1.5 miliardë lekë parashikohen si financim për bonusin e qirave për familjet e pastreha si pasojë e tërmetit të 26 nëntorit 2019.
Nga ana tjetër, shëndetësia do të vijojë të financohet me prioritet, ku një vëmendje e veçantë do t’i kushtohet përballimit të pandemisë COVID-19, përfshirë edhe blerjen e vaksinës antiCovid, si dhe do të ketë një rritje prej 40% të pagave për mjekët, infermierët dhe laborantët e sistemit shëndetësor me një kosto totale vjetore prej 4.5 miliardë lekë.
Arsimi, po ashtu, do të përfitojë një financim në rritje, ku përfshihet rritja me 15% e pagës së mësuesve të sistemit arsimor parauniversitar me një kosto prej 3.5 miliardë lekë si dhe financimi i prioriteteve të Paktit për Universitetin.
Fermerët, krahas skemës së mbështetjes me grante nga buxheti i shtetit dhe nga fondet e IPARD-t, si dhe nga fondi i garancisë të bashkëfinancuar me BERZH, do të mund të përfitojnë nga skema e subvencionimit të naftës, e cila do t’i kushtojë buxhetit të shtetit për vitin 2021 rreth 1 miliard lekë.
Infrastruktura është një tjetër sektor ku do të fokusohet qeveria në vitin e ardhshëm. Në këtë sektor do të investohet në projektet e mëdha, si tuneli i Llogorasë, Unaza e re e Tiranës, rruga Kardhiq-Delvinë etj, si edhe zgjerimi i rrjetit të rrugëve kombëtare dhe akseve rrugore me rëndësi për zhvillimin ekonomik të rajoneve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
