Robotët vrasës zgjedhin dhe sulmojnë objektivat bazuar në përpunimin e sensorëve dhe jo në kontributin e njeriut dhe kjo mund të ketë pasoja të rrezikshme për njerëzimin, thotë Organizata e Kombeve të Bashkuara, duke u bërë thirrje qeverive që të hapin negociatat për një traktat të ri ndërkombëtar mbi sistemet e armëve autonome vdekjeprurëse.
Në një raport të publikuar më 6 gusht 2024, Sekretari i Përgjithshëm i OKB-së, Antonio Guterres u bën thirrje shteteve të përfundojnë marrëveshjen deri në vitin 2026 “për të ndaluar sistemet e armëve që funksionojnë pa kontroll ose mbikëqyrje njerëzore dhe që nuk mund të përdoren në përputhje me të drejtën ndërkombëtare humanitare”.
Për Kombet e Bashkuara, ky traktat duhet të rregullojë të gjitha llojet e tjera të sistemeve autonome të armëve.
“Sekretari i Përgjithshëm i OKB-së thekson efektet e mëdha të dëmshme që do të kishte mbi njerëzimin heqja e kontrollit njerëzor mbi sistemet e armëve”, tha Mary Wareham, zëvendësdrejtoreshë e krizave, konfliktit dhe armatimeve në Human Rights Watch.
Përparimet teknologjike po monitorohen dhe po zhvillojnë gjithnjë e më shumë sisteme armësh të cilat funksionojnë pa kontrollin e rëndësishëm njerëzor, duke deleguar vendimet për jetën ose vdekjen e njerëzve te makinat.
Makina, në vend të operatorit njerëzor, përcakton se ku, kur ose kundër cilës forcë të veprojë.
Raporti i OKB-së është rezultat i një rezolute të OKB-së të dhjetorit 2023 që i kërkon Sekretarit të Përgjithshëm të kërkojë pikëpamjet e vendeve dhe palëve të tjera të interesuara se si të adresohen sfidat dhe shqetësimet e ngritura nga armët autonome.
Raporti i ri i OKB-së përfshin 58 kontribute nga më shumë se 73 vende dhe 33 të tjera nga Komiteti Ndërkombëtar i Kryqit të Kuq dhe grupet e shoqërisë civile, përfshirë Human Rights Watch.
Një rishikim nga projekti i Kërkimit të Automatizuar të Vendimeve të fushatës Stop Killer Robots zbuloi se 47 nga 58 propozimet kanë për qëllim hartimin e një forme ndalimi ose rregullimi për sistemet autonome të armëve.
Në tekst, sekretari i përgjithshëm përsërit se koha që komuniteti ndërkombëtar të ndërmarrë veprime parandaluese për këtë problem po ikën dhe lind nevoja për të vepruar urgjentisht për të ruajtur kontrollin njerëzor mbi përdorimin e forcës.
Me iniciativën e Sekretarit të Përgjithshëm, liderët botërorë do të mblidhen në selinë e Kombeve të Bashkuara më 22 dhe 23 shtator për një samit.
Ata pritet të mbështesin një “Pakt për të Ardhmen” që mbulon një gamë të gjerë iniciativash, duke përfshirë robotët vrasës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
