Kryeministri Rama mblodhi sot qeverinë për të diskutuar tetë kërkesat e parashtruara nga studentët në nisje të protestave të tyre. Në përfundim të mbledhjes, Rama tha se janë marrë disa vendime, me anë të të cilave u jepet zgjidhje kërkesave të ngritura nga studentët.
Kreu i qeverisë tha se vendimet e marra adresojnë kërkesat e studentëve dhe shkojnë përtej tyre.
“Së pari kemi miratuar katër VKM lidhur me kërkesën e parë për përcaktimin e kategorive të individëve që përfitojnë ulje të tarifës së studimit. Për përcaktimin e kritereve për bursat për studentët e shkëlqyer. Së treti kemi ndryshuar VKM për kufirin maksimal të pagesës vjetore të shkollimit për studentët. Së katërti kemi ndryshuar një tjetër vendim për përcaktimin e kategorive të individëve për kriteret e pranimit”, tha ai.
Rama njoftoi ngritjen e një portal të transparencës, në të cilin do të publikohen të gjitha të dhënat që kanë të bëjnë me institucionet e arsimit të lartë në vend.
“Të krijohet portali i transparencës dhe trajtimit të ankesave. Portali të jetë i aksesueshëm nga të gjithë dhe në të të publikohen të dhënat mbi të ardhurat dhe shpenzimet e çdo institucioni të arsimit të lartë”, tha Rama.
Sipas kreut të qeverisë, portali në fjalë do të pasqyrojë të dhënat për buxhetin afatmesëm, informacion për procedurat e tenderave dhe PPP-të, vendimet e bordeve, senateve dhe organeve drejtuese, marrëveshjet në nivel universitetetesh, CV e të gjithë pedagogëve, rezultatet e verifikimit të titujve shkencorë etj.
Po ashtu, me vendim qeverie miratohet ngritja e një structure përgjegjëse për kontrollin e transparencës së arsimit të lartë dhe ankesave. Afati i realizimit do të jetë prilli 2019.
Në lidhje me peshën e votës së studentëve, Rama tha se do të ngrihet një grup ndërinstitucional që do të hartojë modelin e statutit për IAL dhe mbi bazën e tij do të bëhet mbyllja e boshllëqeve të krijuara.
Po ashtu, me vendim qeverie do të ngrihet një komision antiplagjiaturë, i cili do të kalojë në skaner titujt akademikë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
