Gripi i shpendëve vret mbi 200 flamingo në Argjentinë

Një shpërthim i gripit të shpendëve ka vrarë 220 flamingo në veri-perëndim të Argjentinës, kanë konfirmuar zyrtarët.

Zogjtë e ngordhur janë nga lloji i flamingos James (Phoenicoparrus jamesi), i cili jeton në lartësi të mëdha në Argjentinë, Bolivi, Kili dhe Peru.

Lloji H5N1 i virusit të gripit të shpendëve që po përhapet aktualisht në Amerikën e Jugut mund të infektojë një tufë të tërë brenda disa ditësh.

Ai gjithashtu mund të përhapet te njerëzit dhe gjitarët e tjerë përmes jashtëqitjeve dhe pështymës.

Në gusht, më shumë se 50 luanë të detit ngordhën nga gripi i shpendëve në brigjet e Atlantikut të Argjentinës dhe në fillim të këtij viti mijëra prej tyre u gjetën të vdekur në Kili dhe Peru.

Disa nga testet e kryera mbi flamingot e gjetur të vdekur në provincën veriperëndimore të Catamarca dolën pozitive për gripin e shpendëve, tha për mediat lokale zyrtarja e biodiversitetit Anabella Ahumada.

Lagunat në zonë janë gjithashtu shtëpia e dy llojeve të tjera të flamingove, por deri më tani vetëm flamingot e James duket se janë infektuar.

Autoritetet lokale thanë se kishin marrë masa për të frenuar përhapjen e virusit. Ata gjithashtu paralajmëruan vendasit që të mos preknin asnjë kafshë të ngordhur.

Flamingo e James, e njohur gjithashtu si puna flamingo, është kategorizuar si "gati e kërcënuar" nga Bashkimi Ndërkombëtar për Ruajtjen e Natyrës (IUCN).