Deputetët e rinj të opozitës janë betuar sot në sallën e Parlamentit, pas mbledhjes së Këshillit të Mandateve. Ky i fundit konstatoi se katër nga kandidatët e listës së LSI-së i plotësojnë kriteret për të plotësuar vakancat e krijuara nga radhët e partisë së opozitës, pas djegies së mandateve nga parardhësit e tyre në listë.
Ylli Shehu dhe Edmond Rushi nga lista e Tiranës, Enver Roshi nga lista e Elbasanit, Aurora Mara nga lista e Dibrës janë bërë pjesë e seancës që në nisje të saj dhe kanë bërë betimin si deputetë të rinj të Kuvendit të Shqipërisë.
Ndërkohë, katër kandidatë të tjerë kanë dorëzuar formularin e dekriminalizimit në KQZ, pasi kërkojnë të marrin mandatin e deputetit. Nga radhët e LSI-së kanë dorëzuar formularin Elda Hoti, kandidate e listës në Lezhë, dhe Ediola Pashaj në Gjirokastër.
Po ashtu, nga PD-ja kanë dorëzuar formularin e dekriminalizimit Majlinda Halilaj në listën e Tiranës dhe Ligoraq Karamelo, në listën e Korçës.
Pritet mbledhja e Komisionit Qendror të Zgjedhjeve për t’u dhënë mandatin e deputetit 4 kandidatëve.
Vakancat e krijuara nga djegia e mandateve kanë shkaktuar “rrjedhje” sidomos nga radhët e LSI-së. Pavarësisht nga vendimi i partisë për të mos pasur në Parlament përfaqësues të saj, kandidatët e listave kanë shprehur interes për mandatin e deputetit, duke dalë kundër këtij vendimi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
