Dy punonjës të OSHEE-së u pezulluan nga puna pas denoncimit në emisionin investigative “Stop”. Punonjësit e kompanisë së shpërndarjes së energjisë elektrike u shfaqën në një video teksa favorizonin një biznes debitor në këmbim të një shume parash.
Reagimi i OSHEE-së
Operatori i Shpërndarjes së Energjisë Elektrike ndoqi me vëmendje rastin e denoncuar mbrëmjen e së martës në emisionin investigativ “STOP” në Televizionin Klan, ku u pretendua se dy punonjës të kompanisë favorizuan një biznes debitor në këmbim të parave.
OSHEE kreu menjëherë identifikimin e personave të shfaqur në video dhe mori masën e pezullimit nga detyra për shtetasin F.Beshi me pozicion Shef Grupi Operativ dhe H.Nika me pozicion elektricist.
OSHEE do të ndjekë të gjithë hapat ligjore me depozitimin e materialeve në organin e akuzës me synim zbardhjen e plotë të asaj çka u transmetua në emisionin investigativ. Paralelisht, do të kryhet verifikimi i subjektit privat i cili u pretendua të jetë favorizuar nga dy punonjësit e lartpërmendur për rilidhjen e energjisë në shkelje të ligjit.
Sakaq, Operatori i Shpërndarjes së Energjisë Elektrike falenderon emisionin investigativ “STOP” për këtë denoncim ashtu sikurse inkurajon median që të kontribuojë maksimalisht në përpjekjen e kompanisë për të ndëshkuar çdo punonjës që kryen veprime antiligjore.
OSHEE shpreh vendosmërinë për të mos toleruar asnjë rast abuzimi nga punonjësit apo abonentët ndërsa insiston se ligjshmëria në konsumin e energjisë elektrike është një detyrim për çdo abonent biznes apo familjar qoftë ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
