Spraj nga hundët, SHBA miraton vaksinën e parë kundër gripit që mund të bëhet vetë

Shtetet e Bashkuara të Amerikës i kanë dhënë dritën jeshile vaksinës së parë që mund të bëhet vetë.

Administrata amerikane e Ushqimit dhe Barnave ka miratuar vaksinën e parë të gripit që mund të administrohet vetë nga pacienti, në formën e një spraji nazal, i cili këshillohet për moshat 2 deri në 49 vjeç.

Vaksina do të shpërndahet nga një farmaci e dedikuar online, ku çdokush do të mund ta marrë produktin në shtëpi pasi të plotësojë një pyetësor që vlerëson përshtatshmërinë e tij për administrim.  

 “Aprovimi i vaksinës së parë të gripit për vetëadministrim ose administrim të kujdestarit ofron një mundësi të re për të marrë një vaksinë të sigurt dhe efektive të gripit sezonal me lehtësi, fleksibilitet dhe akses më të madh për individët dhe familjet,” tha Peter Marks, drejtor i Qendrës së FDA për Vlerësimin dhe Kërkimin Biologjik.

Vaksina e gripit në formulim spraji ka qenë e disponueshme për rreth njëzet vjet, por deri më tani është kërkuar të administrohet nga një profesionist i kujdesit shëndetësor.

Miratimi i ri vjen pasi një studim konfirmoi se personat mbi moshën 18 vjeç janë në gjendje të vetë-administrojnë vaksinën dhe ta administrojnë atë te njerëzit e tjerë, si në rastin e të miturve.