Venezuelë, katër gazetarë nën akuzë për terrorizëm

Katër gazetarë të arrestuar gjatë trazirave pas zgjedhjeve presidenciale të 28 korrikut në Venezuelë janë vënë nën akuzë për terrorizëm, njoftoi Sindikata e Punëtorëve të Shtypit (SNTP), duke u ankuar se gazetarët nuk janë në gjendje të zgjedhin avokatët e tyre.

“Ne denoncojmë përdorimin e paligjshëm dhe arbitrar të ligjeve kundër terrorizmit në Venezuelë, veçanërisht kundër gazetarëve të arrestuar gjatë protestave paszgjedhore në vend”, tha SNTP në një deklaratë të lëshuar në mediat sociale të mërkurën.

Fotografët Yusner Alvarado (Barinas, Venezuela perëndimore) dhe Daisy Pena (Miranda, Venezuela qendrore), kameramani Paul Leon (Trujillo, Venezuela perëndimore) dhe gazetari Jose Gregorio Carneiro u burgosën të akuzuar për terrorizëm.

Trazirat që pasuan shpalljen e fitores së presidentit në largim Nicolas Maduro kanë marrë jetën e 24 personave, sipas një raporti të përditësuar, nga grupet e të drejtave të njeriut.

Nga ana e tij, Nicolas Maduro njoftoi vdekjen e dy anëtarëve të gardës kombëtare dhe arrestimin e më shumë se 2200 personave.

Midis të arrestuarve janë udhëheqës të opozitës, duke përfshirë gazetarin Roland Carreno, një ekzekutiv i partisë Voluntad Popular (VP, Vullneti Popullor).

Zyra e prokurorit njoftoi gjithashtu se kishte hapur një hetim penal kundër kandidatit të opozitës Edmundo Gonzalez Orutia dhe lideres së opozitës Maria Corina Machado, të cilët lëshuan një deklaratë të përbashkët duke i bërë thirrje ushtrisë të qëndronte “me popullin”.

Të premten e kaluar, Këshilli Kombëtar Zgjedhor konfirmoi fitoren e Maduros me 52% të votave, por pa bërë publike të gjitha procesverbalet e qendrave të votimit, duke siguruar se ai ishte viktimë e hakerimit kibernetik.

Sipas opozitës, e cila publikoi procesverbalet e marra falë vëzhguesve të saj të sondazhit, vlefshmëria e të cilave kontestohet nga Maduro, Gonzalez Urrutia fitoi zgjedhjet presidenciale me 67% të votave.