Skandali i përgjimeve vazhdon ta ndjekë kryeministrin grek Kyriakos Mitsotakis. Gjatë një debati të ashpër në Parlamentin e Athinës, kreu i qeverisë përsëriti se përgjimi i telefonit të kryetarit të një partie opozitare ishte një veprim në përputhje me ligjet, por "politikisht i papranueshëm”. Pre e përgjimeve ra eurodeputeti dhe opozitari Nikos Andrulakis si dhe gazetari i financave, Thanasis Kukakis.
Mitsotakis tha se përgjimet kishin të bënin me çështje të sigurisë kombëtare, pa dhënë sqarime të mëtejshme, ndërkohë që theksoi se ai nuk kishte qenë në dijeni të përgjimeve.
Ish-kryeministri dhe kreu i partisë së majtë Syriza, Alexis Tsipras, e kritikoi ashpër Mitsotakisin. Ai tha se kreu i qeverisë ka detyrim ligjor, politik dhe moral të zbardhë çështjen, ndërsa kërkoi dorëheqjen e tij.
Mitsotakis refuzoi duke argumentuar se gjatë kësaj periudhe ku vendi po përballet me një tjetër valë emigrantësh, ai ka përgegjësinë për të drejtuar vendin.
Skandali i përgjimeve u bë publik në fund të korrikut. Në atë kohë, Andrulakis, kreu i partisë opozitare socialiste Pasok, paraqiti një padi në Gjykatën e Lartë për tentativë spiunimi në telefonin e tij celular, pasi gjeti të instaluar softuerin ilegal Predator. Në vazhdën e zbulimeve, shefi i inteligjencës dhe një këshilltar i afërt i kryeministrit dhanë dorëheqjen.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
