Maqedonia dhe Greqia, me ndërmjetësimin e OKB-së, kanë rinisur procesin e negociatave pas tre vitesh ndërprerje. Në takimin e parë të ndërmjetësit Methu Nimic me përfaqësuesit e dy vendeve në Bruksel, pritet të hidhet propozimi për “Maqedoninë e re”.
Siç bën të ditur televizioni grek, “Star”, nëse Shkupi bie dakord me këtë propozim, do të hapet rruga për zgjidhjen e çështjes së emrit në gjysmën e parë të vitit 2018, siç paralajmëruan edhe kryeministri Aleksis Cipras dhe shefi i diplomacisë greke, Nikos Kocias.
Sipas “Star”, propozimi “Maqedonia e Re” është i njëjti me atë të vitit 1992 në pakon e ashtuquajtur “Pineiro”, që atëherë ishte refuzuar.
Emri me përcaktim gjeografik si “Maqedonia Veriore” nuk është i pranueshëm për palën greke, sepse, siç thuhet, nuk do ta parandalonte irredentizmin e Shkupit dhe implikon ekzistimin edhe të Maqedonisë Jugore, që nuk është e pranueshme edhe për Bullgarinë.
Mirëpo, sipas televizionit grek, çështja është se si propozimi do të kalojë në qeverinë greke, posaçërisht tek Panos Kamenos, partner i koalicionit të Ciprasit, i cili deri më tani kundërshtonte ashpër që fjala Maqedoni të qëndrojë në emrin e fqinjit verior. Ndërsa në lidhje me opozitën nuk priten probleme, pasi propozimi duket se është i pranueshëm për disa deputetë opozitarë, që do të bëjë të mundur kalimin në Parlament.
Raundi i ri i bisedimeve për emrin është planifikuar për sot në Bruksel. Në përfundim të tij pritet një konferencë për shtyp në ndërtesën e Qendrës Informuese Rajonale për Evropën Perëndimore.
Raundi i fundit formal i negociatave të ndërmjetësit të OKB-së me përfaqësuesit e të dy vendeve është mbajtur në Nju-Jork, në nëntor 2014.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
