25 vjet më parë, negociatorët amerikanë kontribuan në arritjen e një marrëveshjeje historike paqeje që i dha fund tre viteve e gjysmë luftë në Bosnje-Hercegovinë.
Marrëveshjet e Dejtonit u arrit pranë Dejtonit, në Ohajo, më 21 nëntor 1995 mes Serbisë, Kroacisë dhe Bosnje-Hercegovinës.
Kjo marrëveshje vendosi mbrojtje për minoritetet dhe hodhi bazat për rikthimin e vullnetshëm të refugjatëve dhe personave të zhvendosur.
Lufta që shpërtheu pas shpërbërjes së ish-Jugosllavisë, shkaktoi më shumë se 100 000 të vdekur dhe zhvendosjen e miliona personave.
”Marrëveshja e paqes e Dejtonit përbën një prej sukseseve më të mëdha të diplomacisë amerikane dhe parimet e këtyre marrëveshjeve vazhdojnë të na ndjekin”, deklaroi Madeleine Albright në vitin 1997, në atë kohë sekretarja amerikane e Shtetit, 17 muaj pas nënshkrimit të saj.
Ishte paraardhësi i saj, Warren Christopher, i cili kryesoi konferencën e paqes në Dejton, ku morën pjesë drejtuesit europianë dhe rusë.
Diplomati amerikan, Richard Holbrooke drejtoi negociatat.
Marrëveshja e Dejtonit parashikonte dhënien fund të dhunës, rindërtimin dhe hapjen e rrugës së paqes.
Marrëveshja ndau administrativisht Bosnje-Hercegovinën në Federatën e Bosnje-Hercegovinë dhe Republikën Serbe.
Ajo gjithashtu krijoi mundësinë për ndarjen e pushtetit për të siguruar që asnjë pakicë të mos ishte nën mëshirën e shumicës.
Shtojca 4 e marrëveshjes përcaktoi Kushtetutën e Bosnje-Hercegovinës, e cila mbetet në fuqi edhe sot.
OSBE, NATO dhe Bashkimi Europian luajtën një rol vendimtar në vendosjen dhe mbikëqyrjen e sigurisë dhe zhvillimit të Bosnje-Hercegovinës.
Përfaqësuesi i Lartë i BE-së për Politikën e Jashtme dhe Sigurinë, Josep Borrell do të jetë sot në Sarajevë për 25-vjetorin e Marrëveshjes së Dejtonit, që i dha fund luftës në Bosnjë-Hercegovinë (1992-1995).
Kreu i diplomacisë europiane do të mbajë një fjalim dhe do të takohet me udhëheqësit e lartë boshnjakë, duke filluar me anëtarët e Presidencës tripalëshe.
Objektivi i vizitës së Borrell-it është të riafirmojë mbështetjen për perspektivën e integrimit europian të vendit ballkanik, një proces që po ecën përpara shumë ngadalë për shkak të konflikteve të vazhdueshme midis tre etnive të vendit.
Sipas Marrëveshjes së Dejtonit, e përfunduar më 21 nëntor 1995 dhe e nënshkruar më 14 dhjetor, Bosnje-Hercegovina përbëhet nga tre popuj, myslimanët, serbët ortodoksë dhe kroatët katolikë, si edhe dy njësi, Federata Myslimane Kroate (BH, 51% e territorit) dhe Republika Srpska (RS, 49%).
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
