Në studion e MCN Informacion, Brunilda Haxhiu, deputete e Partisë së Lirisë; Greta Ambeli, avokate; dhe Evans Drishti, mësues, ekspert për arsimin, diskutuan në lidhje me hapësirat që kanë qytetet për fëmijët, nisur nga aksidenti i një jave më parë në Durrës. Ambeli tha se hapësirat publike mungojnë, Haxhiu u ndal te siguria e fëmijëve, ndërsa Drishti tha se garantimi i të dyjave është detyrë e shtetit.
Greta Ambeli
Ajo në Durrës ishte një ngjarje tragjike. Statistikat e tre muajve të fundit janë një bilanc lufte. Tirana kryeson me 143 aksidente. Ajo që ne konstatojmë përditë është mungesa totale e hapësirave publike për të gjithë ata që janë përdorues të rrugës. Është për të ardhur keq që jetojmë në një qytet kaotik. Mendoj që ky qytet ku ne po jetojmë nuk është ideuar aspak për fëmijët dhe përdoruesit e rrugës. Nuk duhen bërë reformat me tifozllëk. Ndodh diçka dhe pastaj bëhen reformat.
Brunilda Haxhiu
Si janë ndërtuar pallatet dhe çfarë prioritetesh kanë pasur bashkitë, këtë e dimë shumë mirë. Të gjitha hapësirat janë zënë nga pallatet. Është shumë e vështirë të gjenden hapësira për fëmijët. Propaganda është shumë e madhe. Por nuk ka shërbime dhe as siguri. Fëmijët pas shkolle nuk kanë ku të shkojnë. Nuk e kanë të gjithë mundësinë për të shkuar në aftër school. Është e rrezikshme të luajnë në lagje. Ka shumë prindër që i kanë mbyllur në shtëpi, u kanë dhënë një celular në dorë. Është vërtet shumë alarmante dhe po privohen fëmijët nga të drejtat e tyre.
Evans Drishti
Duhej të ishte shpallur ditë zie kombëtare dita e varrimit të dy vogëlushëve. Vdekja e tyre ishte jo vetëm tragjike por edhe vdekje e shoqërisë tonë mbarë. Mungojnë qendrat kulturore, mungojnë hapësirat e sigurta. Këto nuk mund të krijohen nga familjarët por nga personat që janë përgjegjës për qytetin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
