Kandidatja e LSI-së në listën e Tiranës, Eriona Bixha, doli para mediave për të denoncuar sipas saj përpjekjet e segmenteve të caktuara të PS-së për të blerë votën e qytetarëve të Vorës.
Në emër të partisë së saj, Bixha bëri thirrje që policia të marrë masat e nevojshme për të ndaluar këtë fenomen.
“Uragani i fitores plebishitare është kthyer në makth për disa forca politike. Denoncoj drejtuesin e shitblerjes së votave në Vorë, Agim Kajmaku, që makinën e tij Voksvagen e ka shndërruar në bankë, ku në bashkëpunim me drejtues të policisë në përkrahjen e Saimir Tahirit bëjnë skemën e shpërndarjes së parave shtëpi më shtëpi”, tha ajo.
Ajo ka denoncuar edhe Edi Kajmakun, drejtori i ujësjellësit në Kombinat, dhe Ladi Kajmaku që sipas saj janë më të besuarit që përgatisin zonën dhe ushtrojnë presion në bashkinë e Vorës.
LSI ka denoncuar edhe shtetasin Rexhep Shehi dhe Dritan Stoka, punonjës i ALUIZNI. “I bëj thirrje drejtorit të ALUIZNI të shmangë shpërndarjen e legalizimeve për qëllime elektorale. I bëjmë thirrje policisë së shtetit, të marrin masat e nevojshme për ti thënë stop fenomenit të turpshëm për Vorën”, tha ajo.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
