Atë që nuk e bëri Federata Shqiptare e Futbollit dhe Ministria e Arsimit dhe e Sporteve ndaj klubit Skënderbeu, po e bën UEFA. Të dy këto institucione nuk u kujdesën për imazhin e Shqipërisë, por ruajtën interesat klienteliste të drejtuesve të këtij klubi, të akuzuar për trukime të ndeshjeve.
Tashmë shuplaka ka ardhur e fortë nga UEFA. Ky forum i kërkon Apelit të UEFA-s, një përjashtim 10 vjeçar për Skënderbeun nga të gjitha kompeticionet europiane. Vendimi është kërkuar nga ana e Komisionit të Disiplinës në UEFA, i cili bashkëngjit edhe një gjobë prej 1 milion eurosh që ky klub do të detyrohet të paguajë.
Në e-mailin e publikuar, Inspektorët e Etikës dhe të Disiplinës kanë të drejtat e tyre të shtojnë ose të ndryshojnë këtë raport bazuar mbi informacionet apo prova të tjera në lidhje me këtë çështje. Të habit mungesa e ndjesës apo e masave të tilla si dorëheqja në këtë situatë. Përmes një deklarate për shtyp klubi i Skënderbeut thekson se nuk bëhet fjalë për një çështje të re, por për një apelim për vendimin e marrë 2 vite më parë dhe se ata ishin në dijeni të kësaj çështjeje.
Për tu theksuar është se kërkesa për të dënuar klubin e Skënderbeut është publikuar nga komisionet disiplinore të UEFA-s më datë 7 shkurt, ditën kur në vendin tonë u mbajtën dhe zgjedhjet për kreun e ri të Federatës Shqiptare të Futbollit, ku fitues doli për herë të pestë Armand Duka, i cili ka një pjesë të madhe të përgjegjësie për skandalet dhe trukimet që kanë ndodhur në gjithë këto vite në futbollin shqiptar.
Fshehja e dënimeve që ai ka tentuar të bëjë e kanë nxjerrë gjithmonë zbuluar, duke detyruar UEFA-n që me mos ndëshkimet që nuk jepen nga FSHF-ja t’i japë vetë ky institucion. Komisioni i Etikës i Federatës Shqiptare të Futbollit mori një vendim qesharak dhe të paplotë më 23 qershor 2017, për t’i hequr titullin kampion Skënderbeut për sezonin 2015-2016, me argumentimin se ishte përfshirë në trukimin e ndeshjeve.
Përveç kësaj, skuadrës korçare iu hoqën 12 pikë nga sezoni 2016-2017, ndërsa klubit iu vu një gjobë 20 milionë lekë të vjetër. Vendimi erdhi pas analizës që iu bë dosjes “Skënderbeu” të ardhur nga UEFA dhe të konfirmuar (penalizuar) nga Gjykata e Arbitrazhit Sportiv në Lozanë. Ky është një vendim që fsheh mëkatet e presidentit Duka dhe të financuesve të Skënderbeut.
Ndërkaq, pikërisht kur ky klub turpëron futbollin shqiptar në arenën ndërkombëtare, ministria e Arsimit dhe e Sportit bind qeverinë të hedhë 5 miliardë lekë për stadiumin dhe akademinë e futbollit të këtij klubi. Pra, financohet një klub i cili të vazhdojë të luajë baste, që në fakt duhej bërë shembull, me qëllim pastrimin e emrit të futbollit shqiptar. Tani pritet vendimi përfundimtar i komisionit të Apelit të UEFA-s i cili do të marrë vendimin final mbi dosjen Skënderbeu. Pavarësisht se sa do të jetë masa e dënimit, dëmi i është bërë tashmë imazhit të Shqipërisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
