Presidenti i Republikës, Ilir Meta, ka paralajmëruar një protestë më 2 mars. Në një tjetër konferencë të jashtëzakonshme për mediat, kreu i shtetit tha se në datën 2 mars, në bulevardin “Dëshmorët e Kombit”, përpara Kryeministrisë, me popullin shqiptar do të lidhet një besëlidhje “për të shpartalluar regjimin e oligarkëve’.
“Do e marrim me qetësi çmontimin e plotë të grushtit të shtetit. Veprimet e Presidentit do jenë në mbrojtje të Kushtetutës. Ju siguroj që kjo godinë është sot një kështjellë e vetme për fat të keq, por e paepur dhe e pamposhtur për mbrotjen e Kushtetutës dhe demokracisë, nga data 2 mars kur do firmoset dekreti i parë kundër grushtit të shtetit dhe në shpartallim të plotë të grushtit të shtetit përpara bulevardit me popullin shqiptar, ku do lidhim një besëlidhje për të shpartalluar regjimin e oligarkëve me qëllim shpopullimin e këtij vendi dhe shndërrimin e tij në një qendër të pastrimit të parave, dhe të shumë problemeve të tjera që nuk i meriton”, tha Meta.
Duke iu referuar një deklarate të Ramës, i cili u shpreh se presidenti nuk ka mbështetjen e popullit, Meta tha se ata që kërkojnë popullin e Presidentit duhet “të porosisin poture të gjera”.
"Të gjithë institucionet që janë në bulevardin dëshmorët e Kombit do i jepen popullit shqiptar. Ata që kërkojnë popullin e presidentit në Whats App të porosisin poture të gjera”, tha Meta.
Meta paralajmëroi padi të tjera për atë që e quan “grushti i shtetit”.
“Pjesëmarrës ne grushtin e shtetit është vetë qeveria dhe mazhoranca, ai që unë e quaj gjysmë parlament për aryse që ju i dini ca përfaqëson edhe është antikushtetues. Ka persona të tjerë dhe do ketë padi të reja në ditët në vijim. çdo ditë do ketë lajme për grushtin e shtetit”, tha ai.
Në 25 nëntor, presidenti Meta paralajmëroi një protestë për më 8 dhjetor, por kjo u anulua për shkak të tërmetit të 26 nëntorit. Meta pati ftuar të gjithë qytetarët të mblidhen në protestë deri kur parlamenti me 'dele deputetët' sikur i cilësoi ai të miratojë ligjin për referendumet.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
