Burri i gruas më të pasur të Rusisë arrestohet për vrasje

Vladislav Bakalchuk, burri i gruas më të pasur të Rusisë, u arrestua të enjten i akuzuar për vrasje.

Lajmi u dha nga avokatët e tij të cilët thanë se ngjarja ndodhi pas një shkëmbimi zjarri në zyrën e Moskës të shitësit më të madh online të Rusisë.

Dy persona u vranë nga shtënat të mërkurën vetëm pak blloqe larg Kremlinit në zyrën e Wildberries, pasi një debat për të ardhmen e kompanisë mori një kthesë të dhunshme. Shtatë persona mbetën të plagosur, mes tyre edhe oficerë policie.

Vladislav dhe gruaja e tij Tatyana Bakalchuk, e cila paraqiti kërkesën për divorc në muajin korrik, janë përfshirë në një grindje të ashpër dhe publike që kur Wildberries njoftoi planet për t’u bashkuar me firmën e reklamave të jashtme Russ Group në muajin qershor.

Tatyana themeloi Wildberries, rivalen e Rusisë ndaj Amazon në vitin 2004, duke e rritur nga një shitës online rrobash në një treg të madh për të gjitha llojet e mallrave.

Të dyja palët fajësuan njëra-tjetrën për të shtënat e së mërkurës.

Vladislav tha se kishte mbërritur për një takim të paracaktuar dhe se ishte personeli në zyrë ai që qëlloi i pari.

Tatyana shtoi se Vladislav dhe kolegët e tij ishin përpjekur të kapnin zyrën dhe se nuk kishte asnjë takim të planifikuar.

Avokatët e Vladislav thanë se ai ishte arrestuar dhe akuzuar për vrasje dhe tentativë për vrasje të një oficeri të zbatimit të ligjit.

Mosmarrëveshja e biznesit përqendrohet rreth bashkimit që formoi RVB, një kompani e re me Robert Mirzoyan si CEO, e cila reduktoi aksionet e përgjithshme të Tatyana në rreth 65% në RVB nga 99% në Wildberries.