Presidenti Ilir Meta të premten e cilëson të vonuar por pozitiv vendimin e KLGJ-së për të larguar Ardian Dvoranin si anëtar i Gjykatës së Lartë dhe rrjedhimisht edhe nga posti i kryetarit të KED-së.
"Qëndrimi i Presidentit është i Kushtetutës, kanë qenë të qarta. Vendimi është i vonuar, por pozitiv dhe krijon mundësi për të ruajtur integritetin e institucioneve të reja të drejtësisë" tha ai.
Por a mendon kreu i shtetit se anëtarët që do të zgjidhen tani në Kushtetuese do të jenë të pavarur?
"Për mua si president nuk ka qenë dhe nuk do të jenë individët, por legjitimiteti i tyre në raport me ligjin dhe Kushtetutën. Për mua vendimtare ka qenë dhe mbetet, respektimi i Kushtetutës dhe ligjeve", u shpreh Meta.
Përballë gazetarëve presidenti Meta u shpreh edhe për dekretimin e e datës së zgjedhjeve të përgjithshme dhe atyre lokale, duke thënë se do të veprojë sipas kushtetutës dhe jo sipas logjikës së ngjarjeve.
Pyetje: A keni besim se me largimin e Dvoranit do të plotësohen më shpejt vakancat në Gjykatën Kushtetuese dhe a do të dekretohet data e zgjedhjeve të përgjithshme, së bashku me datën e zgjedhjeve lokale?
Meta: Lidhur më çështjen e parë. Mua si president, nuk kanë qenë të rëndësishëm individët, por për mua ka qenë vendimtare respektimi i kushtetutës.
Për çështjen e dytë, mendoj që përgjigja është e qartë se presidenti do të veprojë në raport me Kushtetutën, jo si ai do të donte të vepronte me logjikën normale të ngjarjeve apo të zhvillimeve.
E kam thënë se për mua zgjedhjet e përgjithshme dhe ato vendore duhet të ishin mbajtur dje, por unë do të përmbysh detyrimet e mia ligjore dhe kushtetuese. Kjo çështje u përket palëve të tjera të interesuara.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
