Teksa ditën e sotme është parashikuar mbledhja e Konferencës së Kryetarëve, deputetët e opozitës kanë bllokuar hyrjen e sallës duke mos lejuar mbajtjen e punimeve.
Gjithashtu ata kanë penguar futjen në Konferencën e Kryetarëve të Ministrit të Financave, Ervin Mete, teksa sot pritej diskutimi për buxhetin e vitit 2024.
Gazetarja e MCN TV, Greta Bullari raporton se janë gjashtë deputetët të opozitës të përjashtuar nga punimet e Kuvendit, mes tyre dhe kreu i grupit parlamentar demokrat Gazment Bardhi, i cili gjithsesi është paraqitur në Kuvend ditën e sotme, si pjesë e Konferencës së Kryetarëve.
Partia Demokratike bllokoi sallën e Konferencës së Kryetarëve dhe nuk lejoi të zhvillohet mbledhja.
Ndërkohë PS tentoi ta bëjë mbledhjen në salla të tjera, por PD nuk lejon. Në fund tentuan të mblidhen tek zyra e kryeparlamentares Lindita Nikolla, por edhe aty nuk i lejuan.
Mësohet se deputetët e opozitës nuk lejojnë veprimtarinë normale parlamentare, për sa kohë që nuk plotësohen kërkesat e tyre, për ngritjen e komisioneve hetimore dhe ndryshimin e anëtarëve të Komisionit të Reformës Zgjedhore.
Përballë një situate të tillë Konferenca e Kryetarëve u shty për ditën e enjte në orën 13.00.
Ndërkohë Partia Socialiste ka bërë kallëzim penal për deputetin demokrat Beldjon Nallbati për dhunën fizike ndaj deputetit socialist Vullnet Sina, në seancën e së hënës.
Kallëzimi penal mban firmën e kreut të grupit parlamentar socialist Bledi Çuçi, i cili do të depozitohet në Prokurorinë e Tiranës.
Me anë të një postimi në rrjetet sociale Çuçi shkruan:
Sot, në emër të Grupit Parlamentar të Partisë Socialiste firmosa kallëzimin penal për deputetin Bledjon Nallbati për dhunën fizike të ushtruar në seancën e fundit ndaj deputetit Vullnet Sina.
Qëndrimi ynë është i qartë. Nuk do te tolerojmë asnjë akt dhune dhe refuzojmë këdo që e konsideron dhunën si mundësi për të shprehur mospajtimin.
Ftojmë organet ligjzbatuese të bëjnë punën e tyre dhe t'i shkojnë deri në fund ngjarjes së 30 tetorit në Parlament.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
