Një koleksion veprash arti ka thyer rekordin e të gjitha kohërave për vlerën e shitjes. Tre ankandet e organizuara mbrëmjen e së martës nga Shtëpia e Ankandeve Christie’s, në Nju Jork, kanë kapur vlerën 646 milionë dollarë. Veprat janë kryesisht të shekullit XIX dhe XX.
Ankandi nisi me shitjen e një nudoje të Pikasos, për një vlerë prej 115 milionë dollarësh.
Koleksioni i përkiste çiftit David dhe Peggy Rockefeller. Shitjet e objekeve të tjera do të vijojnë deri më 11 maj.
Koleksioni është një pasqyrë e shijeve të çiftit Reockefeller për artin, që nga impresionizmi e deri te porcelani kinez.
Piktura e Pikasos “Vajza me shportën e luleve” ishte vlerësuar rreth 100 milionë dollarë dhe u shit për 115 milionë. Ajo i përket Periudhës Rozë, një etapë e krijimtarisë së piktorit të madh, që karakterizohet nga përdorimi i nuancave të rozës dhe portokallisë. Piktura më parë ka qenë në pronësi të Gertrude Stein dhe përmendet në një libër të Ernest Hemingway.
Shitja e kësaj pikture po ashtu ka thyer rekorde. Ajo ka kaluar në vlerë një pikturë të Henri Matisse, e shitur për 80.7 milionë dollarë. Piktura e Pikasos ka lënë pas edhe “Zambakët në lulëzim” të Claude Monet, e cila është shitur për 84.7 milionë dollarë.
David Rockefeller ka ndërruar jetë në marsin e vitit të kaluar. Bankieri dhe filantropisti i njohur ka dhuruar afërsisht 2 milionë dollarë për institucione si Rockefeller University, Harvard University dhe Muzeu i Artit Modern.
Të ardhurat nga shitja e këtij koleksioni do të shkojnë për bamirësi.
Rekordi i deritanishëm është mbajtur nga koleksioni i Yves Saint Laurent dhe Pierre Bergé, një total prej 700 veprash arti që janë shitur për 484 milionë dollarë në vitin 2009. / Përgatiti: Gazmira Sokoli /
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
