Breshëri të shtënash me armë u shënuan mesnatën e kaluar, drejt një lokali në zonën e Agios Panteleimonas të Athinës, duke plagosur një vajzë 10-vjeçare me origjinë shqiptare, e cila ndodhej brenda dyqanit të të atit.
Ngjarja e rëndë u shënua rreth orës 23:50 të së premtes, në rrugën Agorakritou nr. 32, kur persona të panjohur me një makinë kaluan jashtë kafenesë “Amora” dhe qëlluan drejt fasadës së dyqanit.
Si pasojë e të shtënave vajza 10-vjeçare e pronarit të lokalit u plagos në këmbën e majtë, fatmirësisht jashtë rrezikut për jetën.
Nga të dhënat paraprake dyshohet se në makinë ndodheshin katër persona, të cilët qëlluan nga brenda makinës përpara se të largoheshin nga vendi i ngjarjes. Në kohën e sulmit, brenda kafenesë ndodheshin dhjetë klientë, të gjithë të huaj.
Makina e përdorur në sulm, sipas raportimeve, u gjet e djegur pak kohë më vonë në zonën e Aspropyrgos.
Lidhur me ngjarjen hetimet janë në vijim për të hedhur dritë mbi autorët e sulmit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
