Mijëra studentë protestuan këtë fundjavë në Kragujevc të Serbisë, duke kërkuar nga autoritetet mbajtjen e përgjegjësisë për incidentin e 1 nëntorit në Stacionin Hekurudhor të Novi Sadit.
Gjatë protestës, përveç bllokimit të rrugëve kryesore, protestuesit vendosën në bulevard 15 karrige me emrat e viktimave, mbi të cilat shkruhej: "15 jetë, 15 orë protestë, 15 javë pa dhënë llogari."
Në tubim u vunë re edhe simbolet e disa organizatave të ekstremit të djathtë, përfaqësues të shoqatës "Klub 451", si dhe veteranë të Brigadës 63 të Parashutës, një njësi taktike e ushtrisë serbe që ka marrë pjesë edhe në luftën e Kosovës.
Megjithatë, studentët u distancuan prej këtyre grupeve. Protestës iu bashkuan gjithashtu edhe shumë profesorë të universiteteve të vendit.
Protestat, të cilat vijojnë prej muajsh, kanë çuar në dorëheqjen e disa zyrtarëve të lartë të qeverisë serbe, përfshirë edhe kryeministrin Milos Vuçeviç.
Ndërkohë, presidenti Aleksandar Vuçiç u ka bërë thirrje studentëve që të angazhohen në dialog dhe të rikthehen në auditorë, duke e cilësuar këtë si veprimin më të mirë për familjet dhe vendin e tyre.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
