Rreth gjysma e qenve në Berlin po mbahen në mënyrë të paligjshme, pasi shumë pronarë dyshohet se po bojkotojnë rregullat e reja të regjistrimit të detyrueshëm, të vendosura pas një rritjeje të madhe të mbajtjes së kafshëve shtëpiake gjatë pandemisë.
Qentë në Berlin janë subjekt i një takse prej vitesh, e cila justifikohet kryesisht me kostot e pastrimit publik. Por në vitin 2022 u vendos një rregullore e re që kërkon që çdo pronar të regjistrojë qenin në një regjistër zyrtar, duke ofruar të dhëna nga mikroçipi i detyrueshëm që duhet të implantohet që në moshën tre muajshe. Rregullorja është përballur me kundërshtime për shkak të kostove shtesë dhe bezdisë administrative.
Sipas të dhënave të publikuara së fundmi nga media lokale, deri në fund të vitit të kaluar, në zyrat tatimore të 17 qarqeve të Berlinit ishin të regjistruar 131,258 qen, të cilët sollën në arkën e shtetit 12.7 milionë euro.
Por në regjistrin zyrtar të qenve (Hunderegister), janë të regjistruar vetëm 66,221 – rreth gjysma e atyre që paguajnë taksën.
Një zëdhënës i qeverisë së qytetit tha se kjo diferencë lidhet me mungesën e informimit, shqetësimet për privatësinë e të dhënave dhe hezitimin për shkak të kostove shtesë.
Regjistrimi online kushton 17.50 euro për çdo qen, ndërsa përmes telefonit arrin në 26.50 euro, tarifa që mblidhen nga një kompani private e kontraktuar nga qyteti.
Zyrtarët paralajmërojnë se mosrespektimi i ligjit mund të ndëshkohet me gjoba deri në 10,000 euro, ndërsa oficerë të rendit bëjnë kontrolle të rastësishme në rrugë e parqe për të lexuar mikroçipat e qenve.
Vetëm vitin e kaluar, 523 persona u sulmuan nga qen në Berlin dhe në 357 raste, qentë kanë kafshuar njëri-tjetrin.
Për racat e rrezikshme, si pitbullët dhe amstaffët, kërkohet regjistrim i veçantë sipas një ligji të vitit 2016.
Deputeti i CDU-së, Alexander J. Herrmann, e cilësoi situatën “të mjerueshme”, duke theksuar se pavarësisht rritjes së regjistrimeve, mbi 65,000 qen vijojnë të qëndrojnë jashtë sistemit, çka ndikon negativisht në kontrollin dhe sigurinë publike.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
